|
Ne Bibliaj TIK NAWAT |
1 Pedro |
|
2 |
1 Yajika, shikajkawakan muchi tay teyek, wan
muchi teshijshikulis wan kwalan wan tatejtenewalis; 2 ken yajyankwik shulut, shikunikan ne chipawak
chichiwal ipal ne palabraj ma iwan shiweyakan pal anmumakishtiat, 3 su ankimatket wan ankitaket ka yek ne Tajtzin.
4 Shiajsikan itech yaja ká se tet yultuk,
tejtenejtuk ipal takamet, ipal Teut ishpejpentuk ika wey ipatiw, 5 wan anmejemet nusan, ken tejtet yultuk,
shimuketzakan ken se kal ipal tuijiu, se palejtal ipal Teut, pal ankalwikat
tejtetakulis ipal tuijiu yejyek ipal ne Teut ipanpa Yeshu Mawaltijtuk.
6 Ika nemi tajkwilujtuk:
Niktalia tik
Tzion se tzintet ishpejpentuk, wey ipatiw,
wan ká ne
kiyulmati inte yawi mushijshikua.
7 Anmupal ne tayulmatit kipia ipatiw. Ipal ne
inte tayulmatit, yaja
“ne tet ne
kitejtenejket ne kalketzanimet
mukwepki n’
itzinteyu kal!”
8 wan
“se tet kan
mukshichaluat, se tatzunchaluas”
ipal ne
mukshichaluat wan ne inte kiyulmatit ne palabraj ne mutalilijket. 9 Anmejemet ne techan ishpejpentuk, ne palejtal
ipal ne tatekimaka, ne techan ipal Teut, ne ipal pal kiane welit antaneshtiat
ken yek ne ká walmetzinnutzki pal ankisat tik ne takumi wan anhajsit itech ne
itawilyu galantzin. 10 Anmejemet katka inte techan, ashkan itechan
Teut; inte ankimattuyat itetasujtalis, ashkan ankimatketa.
11 Yejyektasujtatuk, nimetzintajtani ken
ejkunimet wan pashaluanimet ma inte shikchiwakan tay kielewia ne anmunakayu ne
musuma iwan ne anmualmaj. 12 Shimuwikakan yek ijtik ne tejtechan, pal
kiane kwak metzintejtenewat pal inat ka anmejemet inte yejyek, yawit kitat ne
anmutejtekiw yek, wan inasket ka wey ne Teut tik ne tunal ipal tapachiwilis.
13 Shiktakamatikan muchi tay kiketztiwit takamet
ipanpa ne Tajtzin: asu tatuktiani ken ne mas wey, 14 asu ne tatekimakat ká yaja kintitanijtuk pal
kintzunkwit inteyekchiwat wan pal inat ka yejyek ne kichiwat tay yek, 15 ika ijkiuni kineki ne Teut, pal ankichiwat
tay yek wan pal te welit inat tatka ne melemet inte kimatit tatka; 16 pal ankichiwat ken sejse welit kichiwat tay
kinekit: intesu pal welit ankichiwat ichtaka ne tay teyek, asunte ken
itejtekitini Teut. 17 Shikchiwakan respetar muchi, shiktasujtakan
ne iknikayu, shiktakamatikan ne Teut, shikmakakan honor ne tatuktiani.
18 Ne kaltekitinimet, shinakakan itan itajpal ne
anmutejtekuyu wan shiktakamatikan, tesu sema ne yejyek wan yajyamanik, nusan ne
majmalintuk, 19 ika uni kipia ipatiw, asu se inte kichijki
tatka wan tajselia ika kimati Teut tik iyulu. 20 Ika tay tiawit titaketzat su antajseliat kwak
ankichiwat tay te yek wan metzinmakat? Pero su ankichiwat tay yek wan
antajseliat nejnejmach, uni kipia wey ipatiw ipal Teut.
21 Yaja taika metzinnutztiwit, ika ne
Mawaltijtuk nusan taekuj ka anmumaku wan metzinhajkawilij se ejemploj pal
annejnemit ka ipan kan yaja taksatuk. 22 Yaja inte kichijki tatka tay inte yek, nian
muajsik sechin teshijshikulis ijtik ne iten. 23 Kwak kitejtenejket, yaja inte najnankilia
katka iwan kwalan, inte ina katka ka yawi kinchiwilia tay kinkukua: yaja
mutemakak iwan ne kichiwa juzgar ken yek. 24 Yaja isel kiwikak tik ne iweyka, ijpak ne
cruz, ne tay tejemet tikchijtiwit tay te yek pal tejemet ká tipulijtiwit ipanpa
ne tajtateyekchijtuk tiwelit tiyujyultuk ipanpa ne tamelakchiwalis. Yaja
mushutak pal anmejemet pajtit. 25 Melka anmejemet ken ichkamet ne anpulijtiwit,
ashan anmukweptiwit itech ne tajpiani wan tapachiwiani ipal ne anmuajalmaj.
|
Ne
Bibliaj TIK NAWAT |
· 1 Pedro |
Ini ijiswat muitat mas
yek iwan Windows 7 |
© 2012, Ne Bibliaj Tik Nawat © Jan Morrow |