Ne Bibliaj Tik Nawat

Ne Bibliaj

TIK NAWAT

2 Korinto

NE UKSE TAJKWILUL IPAL NE TUKNIWAN IPAL KORINTO

2 Korinto

1 Naja, Pawlo, ititanijtuk ne Mawaltijtuk Yeshu ipanpa itaelewilis Teut, wan ne tuiknew Timoteo, tiktuktiat ini tajkwilul itech ne sennemit ipal ne Teut ne nemi tik Korinto iwan muchi ne tayulmatit ne nemit tik muchi Akaia: 2 ma metzinmaka ne tuteku Teut, wan tutajtzin Yeshu Mawaltijtuk, itetasujtalis wan inejmachnemilis.

3 Yektenejtuk ne Teut,

n’ iteku tutajtzin Yeshu Mawaltijtuk,

n’ iteku muchi ne ejekneli

wan Teut ipal muchi tepalewilis.

4 Techpalewia tik muchi ne tuuijkayu

pal tejemet welit tikpalewiat ká nemit tik uijkayu

iwan ne tepalewilis ne tikwit tejemetsan itech ne Teut,

5 ika ijkiunisan ken tepewit ne itajtaekulis ne Mawaltijtuk ijtik tejemet,

nusan ipanpa ne Mawaltijtuk tepewi ne tutepalewilis.

6 Asu timupitziniat, yaja pal ma shimupalewikan wan ma shimumakishtikan; wan asu timupalewiat, yaja pal ma shimupalewikan ika ankinejmachseliat uni tajtaekulis kenha ken tejemet nusan titaekuat, 7 wan tikpiat wey tejchialis anmupal ika tikmatit ka kenha ken anmejemet tukunpawan tik ne tajtaekulis, nusan antukunpawan tik ne tepalewilis.

8 Tiknekit tel ma shikmatikan, nukniwan, keski timupitzinijtiwit tik Asia: ne tuujuijkayu muchijket sujsul ejetek hasta kan tinat katka ka tiawit timikit. 9 Melka uni, tejemet tikpiatuyat ne condenaj ipal mikilis ijtik tejemetsan pal kiane te talnamikit ka tiwelit tatka tusel wan pal tikyulmatit ne Teut, ká kiketza ne mijmiktuk, 10 wan yaja techmakishtij itech sujsul wey mikilis, wan techmakishtia, wan yaja ká titejchiat ka nusan yawi techmakishtia senpa, 11 su anmejemet nusan mutajtaweliat pal tasenpalewiat ka tumaku, pal kiane, itech ne intetakulis muchi ka tumaku, ma inakan miak panpadiush tupanpa.

12 Timuweymatit ipanpa ne tutasenmatilis ka timuwikatiwit tik ne taltikpak iwan kanawakayu wan yulchipakayu, tesu iwan ne tamatilis ipal ne tuweyka sute iwan ne tetasujtalis ipal Teut, wan sujsul mas anmuwan, 13 ika sema titajkwiluat pal timetzinhilwiat ne tay antakaktiwita o ankimatit. Nitejchia ma shikelnamikikan senpa, 14 ijkiunisan ken ankishmatketa se chiupi: ka tejemet tianmumuweymatilis, kenha ken anmejemet nusan tumuweymatilis, tik ne tunal ipal ne tutajtzin Yeshu.

15 Wan iwan ini tayulmatilis niknekituya niajsi anmutech achtu pal ankipiat ukse tetasujtalis, 16 wan nipanu anmutech pal niaw Macedonia, wan senpa nikisa Macedonia wan niajsi anmutech pal annechtuktiat tik Yudaya. 17 Kiane tel, kwak niknekituya uni, anka anhinat ka ninak ken se tay ajkatik, o ka kwak nitanawatia pal nikchiwa se, nitanawatia pal ma su ijkia, ijkia, wan su inte, inte? 18 Kimati ne Teut ka ne palabraj ne timetzinmakat tesu ijkia wan inte.

19 Ika ne ikunew ne Teut, Yeshu Mawaltijtuk, ne timetzinnajnawatijtiwit naja wan Silvanus wan Timoteo, tesu katka ijkia wan inte, sute ijkia muchijki ijtik yaja, 20 ika muchi tay sentaketza ne Teut ipanpa yaja, ijkia. Neka nusan ijtik yaja tinat “amen” pal inat ka wey ne Teut tupanpa. 21 Ne techtalia yek anmuwan tik ne Mawaltijtuk wan techmawaltij, yaja Teut. 22 Yajaya nusan ne techtetilijtuk wan techmakatuk ne achtu ipal ne Ijiutzin tik tuyujyulu.

23 Niknutza ne Teut pal ina ka tejkia ipanpa ne nualmaj ka teuk niajsituk Korinto ika niknekik nimetzinpalewia, 24 tesu ika titatuktiat ijpak ne anmutayulmatilis, sute titapalewianimet ipal ne anmupakilis, ika annakat ijtik tayulmatilis.

Ne Bibliaj

TIK NAWAT

· NE BIBLIAJ TIK NAWAT

· 2 Korinto

· 2 Korinto tik ukse taketzalis

Ini ijiswat muitat mas yek iwan Windows 7