Ne Bibliaj Tik Nawat

Ne Bibliaj

TIK NAWAT

2 Korinto

1 Ika ini ninak tik nuyulu: ka te niaw niajsi anmutech senpa iwan yulkukulis. 2 Ika su naja nikchiwa ka metzinkukua anmuyulu, ká nechyulkwesua sute ne yulkukujtuk nupanpa? 3 Wan nikijkwiluj yajini pal te niaw nikpia yulkukulis anmutech kwak annemit pal nechmakat pakilis. Nikmati tik nuyulu ka su nipaki, muchi anmejemet yawit pakit. 4 Nimetzinnutzki tik nutajkwilul iwan wey penaj wan sujsul yulpitzinijtuk wan nichukak, tesu pal metzinkukua anmuyujyulu sute pal kiane ankimatit keski nimetzintasujta anmejemet mas que muchi.

5 Su aka tayulkukujtuk, tesu naja nechyulkukujtuk sute achi (ma te nimetzinkechtanu sujsul) muchi anmejemet. 6 Techajsi ipal se ijkiuni uni castigoj ne kichiwiliat miak, 7 yajika mas yek ma shiktasujtakan wan shikpalewikan, ka su te, ne ipenaj sujsul wey weli kitulua. 8 Neka nimetzintajtani ma shikmakakan tetasujtalis, 9 ika yaja nusan taika nitajkwiluj, pal nimetzintalilia se taejekulis pal nikita su annechtakamatit ijtik muchi. 10 Su ankitapupulwiat se ipanpa tatka, naja nusan, ika naja nusan nitetapupulwijtuk, su niktapupulwijtuk tatka, ka anmumaku tik itachialis ne Mawaltijtuk, 11 pal kiane ne Tenewani te techshijshikua, ika tikmatit tay yaja kineki.

12 Kwak niajsik Troyas pal nitamaka ne iyeknawatilis ne Mawaltijtuk wan tapuik ne tentzajka nupal ipanpa ne Tajtzin, 13 te welik ninejmachnemi ika te nikajsik ne nuiknew Titus, wan nikinhajkaw wan nikiski wan niajki Macedonia.

14 Tashtawi ne Teut, ká senpa techmaka ne victoriaj ipanpa ne Mawaltijtuk, wan tutech taneshtia nujme ken puputuka ne itamatilis; 15 ika tejemet tiipuputuka ajwiak ne Mawaltijtuk ipal ne Teut, ijtik ne mupalewiat wan ijtik ne puliwit; 16 ipal se, tejemet tiijiu mikilis wan kineki ina mikilis, ipal seuk tejemet tiipuputuka yulkwilis wan kineki ina yulkwilis.

Wan ká weli muchi uni? 17 Tejemet te tikenhat ken miak ne nujme pashaluat kinamakat ne ipalabraj ne Teut, tejemet te titashijshikuat, sute titanutzat ken itech Teut, tik itachialis Teut, tik ne Mawaltijtuk.

Ne Bibliaj

TIK NAWAT

· NE BIBLIAJ TIK NAWAT

· 2 Korinto

· 2 Korinto tik ukse taketzalis

Ini ijiswat muitat mas yek iwan Windows 7