Ne Bibliaj Tik Nawat

Ne Bibliaj

TIK NAWAT

2 Korinto

1 Tisentekitit, wan timetzintajtanit ma te shikwikan ne teutasujtalis ken su te tatka, 2 ika ina:

“Tik ne shiwit yek nimetzkakik, tik ne tunal ipal tamakishtilis nimetzpalewij.”

Nemia ashanchin ne shiwit kwak yek, nemia ashanchin ne tunal ipal tamakishtilis!

3 Inte tikchiwiliat aka tatka pal ma mutasa, ma te inakan tatka ipanpa ne tutekitilis; 4 tik muchi tikilwitiat ka tiyejyek ken itejtekitini Teut: iwan wey tanejmachselilis, iwan uijkayu, tik tajtapachulis, tik ijiumikilis, 5 melka techwitekit, melka techtzakwat, tik kumunilis, tik kujkutialis, su tikishpelwiat, su tikseliat mayan; 6 tiyujyulchipawak wan tikpiat taishmatilis; titejchiat wey wan sea tiyajyamanik; iwan ne Ijiutzin, iwan yekkaya tetasujtalis; 7 iwan ne tejkia, iwan itajpal Teut, iwan ne tajtaiwan ipal ne tamelakchiwalis ijtik ne se tumey wan ne seuk; 8 su inat ka tiyejyek o ka te, su tupanpa taketzat teyek o yek: ka titashijshikuat, melka tinat ne tejkia; 9 ka te aka techishmati, melka techishmatit muchi; ka timikit, melka ashan tiyujyultuk; ka techwitekit, melka te techmiktiat; 10 ka timutechtiat, melka senpa tipakit; ka timunekit, melka tiktepewiliat miak; ka te tikpiat tatka, melka muchi nemi tik ne tumey.

11 Ne tuten tapuituk anmupal, nukniwan ipal Korinto! Ne tuyulu patajtuk! 12 Tesu anmupitziniat tupanpa, anmupitziniat ipanpa ne anmuyujyulu. 13 Ka ipatka, nimetzinhilwia ken su annukukunew, shipatawakan!

14 Maka shimusenhilpikan anmejemet iwan sejse te kipiat tayulmatilis, ika ken welit muchiwat inkunpawan ne tamelakchiwalis iwan ne teyek? Ken welit musentepewat tawil wan kunyua? 15 Ken yawit mukawa pal sentekiti ne Mawaltijtuk iwan ne Tatkaipatiw? Wan tay weli kichiwa se tayulmati iwan se te tayulmati? 16 Katiawel ne sentaketzat ipal ne iteupan Teut iwan teujteutzitzin? Ika tejemet ne iteupan ne Teut yultuk, ijkiunisan ken inak ne Teut, inak:

“Niaw nimuchantia intzalan, wan ijtik yejemet niaw ninejnemi, wan naja niinteut wan yejemet nutechan. 17 Neka shalkisakan tik intajku wan shalmukupewakan, ina Tutajwan, wan maka shikmatukakan tay susul, wan naja nimetzinkwis 18 wan nimuchiwas anmuteku, wan anmejemet muchiwasket nupilawan wan nusiwakunewan, ina Tutajwan ne weli muchi.”

Ne Bibliaj

TIK NAWAT

· NE BIBLIAJ TIK NAWAT

· 2 Korinto

· 2 Korinto tik ukse taketzalis

Ini ijiswat muitat mas yek iwan Windows 7