|
Ne Bibliaj TIK NAWAT |
2 Korinto |
|
7 |
1 Yek, nuyejyektasujtatuk, tikpiat ini
projpromesaj; yajika, timupupukan pal timuishtiliat muchi tay susul tik
tunakayu wan tuijiu, wan timuchiwakan sujsul yejyek ika tiktakamatit Teut.
2 Shitechkwikan tik anmuyujyulu. Te aka
tikchiwilijtiwit tatka, te aka tikwilejtiwit, te aka tikshijshikujtiwit. 3 Tesu nina pal nina ka aka te yek, ika
nimetzinhilwija ka annemit ijtik ne tuyujyulu, hasta ma timikikan anmuwan o
tiyujyultuk. 4 Nimuwika sujsul melaknaj anmuwan; nimuweymati
sujsul anmupanpa; nimuyultia iwan tepalewilis; nitepewi iwan pakilis hasta
ijtik muchi ne tupejpenaj.
5 Kwak tejemet tiajsiket Macedonia, ne tuweyka
te kipiatuya tatka tay muneki pal nemi yek. Tikpiatuyat miak penaj: tatenpan
tajtasumalis, kalijtik mawi. 6 Melka uni, ne Teut ká kinpalewia ne kukunet
techpalewij wan ajsik Titus, 7 wan te semaya ajsik tutech, nusan muyulpaktij
anmupanpa wan techneshtilij ne anmutaelewilis, ne anmuijiumikilis wan ne
anmudevocion ka numaku; yajika nipakik sujsul.
8 Nikmati ka iwan ne amat nimetzinkwalantij.
Tesu nimuyulpata, melka achtu nimuyulpatak ika nikita ka uni amat kwakuni
metzinkwalantij. 9 Ashan nipaki, tesu ika ankwalanket sute ika
ankwalanket hasta yulpatalis; ika ankwalanket itan Teut wan kiane te panuk
tatka tay te yek tupanpa; 10 ika ne kwalan itan Teut tekiti pal ma nemi
yulpatalis pal se mumakishtia wan te muyulpata mas. Ne kwalan ipal ne
taltikpak, tesu: yaja tekiti pal kalwika mikilis. 11 Tikitat ipanpa uni kwalan itan Teut keski
anmunelwijtiwit, annankilijtiwit, anmumattiwit teyek, anmajmawtiwit,
antaelewijtiwit, ankiejekujtiwit, antatzunkwijtiwit. Ijtik muchi
antaneshtijtiwit ka te ankichijtiwit tatka; 12 yajika tel, su niktuktij anmutech uni amat,
tesu ipanpa ne kichijki tay teyek nian ipanpa ká ne kichiwilijtiwit, sute pal
kiane ma muneshti anmuishpan keski anmunelwiat ipanpa, tik itachialis ne Teut. 13 Ipanpa ini, niyulpakituk.
Nusan sujsul
tiyulpakitiwit iwan ne pakilis ne techmakak Titus, ká nusan paki ika musewijtuk
ne iyulu ipanpa muchi anmejemet; 14 ika su nikilwij se pal nimuweymati anmupanpa,
te nishpinawa, wan ken muchi tay timetzinhilwijtiwit tejkia, nusan ijkiuni ne
tumuweymatilis iishpan Titus muchijtuk tejkia, 15 wan yaja metzintasujta mas kwak kielnamiki
ken muchi anmejemet kitakamatket wan kikwijket anmutzalan iwan mawi wan
ijtzilikalis. 16 Nipaki ika tik muchi nikpia yulpakilis
anmupanpa.
|
Ne
Bibliaj TIK NAWAT |
Ini ijiswat muitat mas
yek iwan Windows 7 |
© 2012, Ne Bibliaj Tik Nawat © Jan Morrow |