Ne Bibliaj Tik Nawat

Ne Bibliaj

TIK NAWAT

2 Korinto

1 Shikmatikan, nukniwan, ka ne sejsennemit ipal Macedonia kikwijtiwit wey teutasujtalis. 2 Nemit ijtik taejekulis wan tapitzinilis wey, wan iwan muchi inpakilis tamakatiwit wey iwan inyulu yek melka te kipiat tatka. 3 Weli nimetzinhilwia ka yejemet, ipanpa taishpejpenilis, kichijtiwit muchi tay welituyat wan mas. 4 Sujsul mutajtawelijket wan techtajtanket ma tikajkawakan techpalewiat tik ne tutekitilis ipal ne tayulmatit, 5 wan tesu semaya ken titejchiat katka: mutemakaket iwan ne Tajtzin achtu, wan tuwan iwan itaelewilis Teut, 6 wan kiane titajtanket iwan Titus, kenha ken pejki, ijkiunisan ma tami anmuwan uni tekitilis ipal tetasujtalis.

7 Kenha ken tik muchi antepewit: tik tayulmatilis wan taketzalis wan taishmatilis wan muchi taelewilis, wan tik ne anmutetasujtalis ne kistuk tutech, ma shitepewikan tik uni nusan; 8 tesu nina ken tatuktilis sute ma nikejeku ne anmutetasujtalis yekkaya ken sejseuk kitamachiwat.

9 Ankishmatit ne itetasujtalis ne tutajtzin Yeshu Mawaltijtuk wan ken ka anmumaku muchijki se te kipia, kwak yaja kipiatuya, pal anmejemet kipiat wey ika yajane te kipia. 10 Tik ini nimetzinhilwia tay nikmati, ika yek anmupal: ika anmejemet te sema ashan pejtiwit kichiwat, ne shiwit panutuk nusan anpejket kinekit kichiwat ijkiuni. 11 Ashan tel shitamikan ankichiwat, pal kiane ken ankinektiwit nusan anyawit kitamiat iwan tay ne ankipiat, 12 ika su ne taelewilis nemi, mukwi yek wey o chiupi ken tay ne kipia se, tesu ken tay ne te kipia se; 13 ika tesu nemi pal tiktakuliat ne sejseuk ma yejemet kipiakan wan ma anmejemet shimupitzinikan, sute pal muchi nemit kenhat. 14 Tay ne ashan anmupal tepewi, ma nemi pal ne tay yejemet munekit, pal kiane su se tunal tepewi inpal ma nemi pal ne tay anmejemet munekit, pal annakat kenhat, 15 ken muijkwilujtuk:

“Ipal ká ne kianki wey inte tepewik, wan ipal ká ne chiupi inte munekik.”

16 Tashtawi ne Teut: yajaya ne kichijtuk ka Titus kineki metzinpalewia ken tejemetsan. 17 Inak ka yek, wan yaja isel inak ka yawia kisa mutalua pal ajsi anmutech. 18 Tiktuktijtiwit iwan ne tuiknew ká ne muchi inat ka yek ipanpa ken tanajnawatia ne yeknawatilis, 19 wan te semaya uni: nusan yaja kitukaytijtiwit ne sejsennemit ma yawi pashalua tuwan pal titekitit pal titamakat ini tetasujtalis pal inat muchi ka wey ne Tajtzin, wan ijkiuni tiknekit tejemet. 20 Tesu tiknekit ma inakan tatka tupanpa ika tikmajmakat wey tumin, 21 ika tikpachiwiat ken tikchiwat yek, tesu sema tik itachialis ne Tajtzin, nusan tik itachialis takamet.

22 Tiktuktijtiwit inwan ne tuiknew ká tikejekujtiwit seujseujti wan tikitztiwit ka wey ipatiw. Ashan hasta mas, ika metzinyulmati wey.

23 Shikelnamikikan ka Titus nukunpa wan tusentekitini; wan ne tukniwan tijtitanijtuk ipal ne sejsennemit ma tzitzinaka ne Mawaltijtuk. 24 Yajika, shikinhilwitikan ne anmutetasujtalis wan ka timuweymatit iishpan ne sejsennemit.

Ne Bibliaj

TIK NAWAT

· NE BIBLIAJ TIK NAWAT

· 2 Korinto

· 2 Korinto tik ukse taketzalis

Ini ijiswat muitat mas yek iwan Windows 7