Ne Bibliaj Tik Nawat

Ne Bibliaj

TIK NAWAT

2 Korinto

1 Najasan, Pawlo, iwan wey iyulyamanikayu ne Mawaltijtuk nimetzintajtani, naja ká melka nikanawak kwak ninemi anmuishpan nichikawaya nimetzinnutza kwak te ninemi anmuwan, 2 ashan kwak teuk ninemi, nimetzintajtani ma te niaw nimuneki nichikawaya kenha ken nikishketza ka nikchiwa iwan ne techijilwiat ka timuwikat ken tunakayu. 3 Melka ijkia tinejnemit tik tunakayu, tesu timusumat ken kichiwat ne muwikat ken innakayu.

4 Ika ne tajtaiwan ipal ne tutasumalis tesu ipal tuweyka sute kipiat intajpal ipanpa Teut. Ne tutajtaiwan welit kitajkalit cajcastilloj, welit nankiliat tajtaika, 5 welit kitemultiat muchi wejkapan tay kitejtenewa ne taishmatilis ipal Teut, welit kikwit tik tailpilis muchi yultaketzalis pal kitakamati ne Mawaltijtuk, 6 wan techajshitia pal tiktzunkwit muchi ká te tetakamatit kwak yekawi ne anmutetakamatilis.

7 Ankitat ne nemi anmuishpan. Su aka kimati ka yaja ipal ne Mawaltijtuk, ma kishkejketza ini, ka ijkiunisan ken yaja ipal ne Mawaltijtuk, tejemet nusan kiane. 8 Wan melka nimuweymati sea ipanpa ne tutatuktilis ne techmakatuk ne Tajtzin pal timetzinhskaliat wan tesu pal timetzintajkalit, te niaw nishpinawa. 9 Ma te aka kikejketza ken su nimetzinmutiskia iwan ne tajtajkwilul, 10 ika inat: melka ne ajamat ejetek wan tajtajpaltik, kwak walajsi kukuya iweyka; kwak taketza te tatka ipatiw! 11 Ma se ijkiuni kishketza ini, ka ken titajkwiluat ijtik ajamat kwak te tinemit, ijkiuni titekitit kwak tiajsit.

12 Tejemet te timukejketzat ken ankakeski tukniwan ká inat insel ka yejemet yejyek, nian timusenpepetat inwan; yejemet mutamachiwat ijtik yejemet wan musenpepetat ne sejse iwan ne sejseuk wan te kimatit tatka.

13 Tejemet te timuweymatit iwan se tamachijka ne te tupal, sute iwan ne tamachijka ipal ne ajshitilis ne techmakak ne Teut, se tamachijka pal tiejkut hasta anmejemet. 14 Te timukujkutilanat sujsul ken te tiejkuskiat anmutech, ika tiajsitiwita anmutech titamakat ne iyeknawatilis ne Mawaltijtuk. 15 Te timuweymatit iwan se tamachijka ne semaya yek ipal tepal tejtekit. Tejemet tikpiat tejchialis ka kwak weya ne anmutayulmatilis, tiawit timuchiwat sujsul wejwey anmupanpa ken ne tuajsitilis, 16 pal titayeknawatiat tik talmet mas wejka; tesu pal timuweymatit iwan tepal ajshitilis ne nemia.

17 ”Su ajaka muweymati, ma muweymati ipanpa ne Tajtzin.”

18 Ika tesu muita yek yajuni ká kineki tailwitia ka yaja yek sute ká ne Tajtzin ina ka yek.

Ne Bibliaj

TIK NAWAT

· NE BIBLIAJ TIK NAWAT

· 2 Korinto

· 2 Korinto tik ukse taketzalis

Ini ijiswat muitat mas yek iwan Windows 7