|
Ne Bibliaj TIK NAWAT |
2 Yojan |
NE UKSE
TAJKWILUL IPAL YOJAN
2 Yojan
|
1 |
1 Naja, ne tatanoy, nimetztajpalua ne nantzin
ishpejpentuk wan ne ikukunew, ne nikintasujta tetekia, wan tesu semaya naja,
nusan muchi ká kishmatit ne tejkia, 2 ipanpa ne tejkia ne naka ijtik tejemet wan
tuwan nemis pal senpa. 3 Tuwan nemis tetasujtalis wan nejmachnemilis
ne witz itech tuteku Teut wan itech Yeshu Mawaltijtuk ne ikunew ne teteku ijtik
tejkia wan tetasujtalis.
4 Sujsul nipakik ika nikajsik ne mukukunew
nejnemit ijtik tejkia, ken techtuktij ne tuteku, 5 wan ashan nimetztajtani, nantzin, intesu ken
su nimetztuktiskia se tay yankwik asunte se tay tikpiatuyat kwak pejki muchi,
ma anmejemet shimutasujtakan; 6 wan ini ne tetasujtalis pal tinejnemit ken
yaja techtuktij. Ini ne tatuktilis kenha ken ankikakket kwak pejki pal
annejnemit ijtik yaja.
7 Ika miak tashijshikuani kistiwit tik ne
taltikpak ne inte inat ka Yeshu Mawaltijtuk walaj ijtik iweyka. Yajuni ne
tashijshikuani wan ne sankamawaltijtuk. 8 Shimuishpelwikan ma inte shikpulukan tay
titekittiwit asunte ma shikwikan muchi anmupatiw.
9 Muchi ká inte kichiwat ijkiuni wan inte nakat
ijtik ne itamachtilis ne Mawaltijtuk, inte kipiat Teut. Ká ne naka ijtik ne
tamachtilis, yajane kipia ne teteku wan ne kunet. 10 Asu se ajsi anmutech wan te kalwika ini
tamachtilis, maka shikalaktikan ka anmuchan wan maka shiknutza, 11 ika ne ká kinutza muchiwa ikunpa tik ne
itekiw inte yek.
12 Nikpia miak pal nimetzinhilwia, wan te niaw
nikijkwilua muchi pak amat, mas yek niknekiskia niajsi anmutech nitachia wan
nitanutza anmuwan pal tipajpakit sujsul.
13 Metztajpaluat ne ikukunew ne mueltiw
ishpejpentuk.
|
Ne
Bibliaj TIK NAWAT |
· 2 Yojan |
Ini ijiswat muitat mas
yek iwan Windows 7 |
© 2012, Ne Bibliaj Tik Nawat © Jan Morrow |