|
Ne Bibliaj TIK NAWAT |
2 Timoteo |
NE UKSE
TAJKWILUL IPAL TIMOTEO
2 Timoteo
|
1 |
1 Naja, Pawlo, ititanijtuk ne Mawaltijtuk Yeshu
ipanpa itaelewilis Teut ipanpa ne promesaj ipal yulkwilis ijtik ne Mawaltijtuk
Yeshu, 2 niktuktia ini tajkwilul itech Timoteo nukunew
tasujtatuk. Ma metzinmakakan ne Teut tuteku wan ne Mawaltijtuk Yeshu tutajtzin
tetasujtalis, tepalewilis wan nejmachnemilis.
3 Tashtawi ne Teut, ká ipal naja wan nunoywan
pal ikman titekitit iwan chipawak tasenmatilis, ken inte nimukawa
nimetzelnamiki kwak niktajtani ne Teut ka tayua wan ka tunal. 4 Nikelewia nimetzita ika nikelnamiki ken
tichukak, pal nitemi iwan pakilis. 5 Nikelnamiki ne yekkaya tayulmatilis ijtik
taja, ne nemik achtu ijtik ne munoya Lois wan ne munan Ewnike, wan nikmati ka
nusan ijtik taja.
6 Yajika nimetzelnamiktilia ma mimilaka ne
itetakulis ne Teut ne muajsi ijtik taja ika niktalij nujnumey mujpak, 7 ika ne Teut tesu techmakatuk se tuijiu ipal
mawi sute se tuijiu ipal tutajpal wan tetasujtalis wan pal tikpiat yek
tutzuntekun.
8 Yajika, maka shishpinawa ipanpa ne
taneshtilis ipal ne Tutajtzin nian nupanpa naja, ne iilpituk; shikeku tay te
yek taja nusan ka imaku ne yeknawatilis iwan itajpal Teut. 9 Yaja techmakishtijtuk wan technutztuk iwan
itanutzalis Teut, tesu ipanpa tay tejemet tikchijtiwit sute ipanpa iajshitilis
wan itetasujtalis ne techmakak ipanpa ne Mawaltijtuk Yeshu kwak intea pejtuya
muchi, 10 wan ashan muneshtija ika walaj ne
tutamakishtiani ne Mawaltijtuk Yeshu, ká ne kipulua ne mikilis wan kitawilua ne
nemilis wan yulkwilis pal senpa ipanpa ne yeknawatilis 11 ne ipal nechtalijtuk ken tanawatiani wan
titanijtuk wan tamachtiani, 12 wan yajika nusan nitaekua; melka uni te
nishpinawa ika nikishmati ne nikyulmattuk wan nikmati ka weli tajpia ne
nutalilijtuk hasta uni tunal. 13 Shikwi ken ejemploj ne yejyek palabraj ne
tikakik nutech iwan tayulmatilis wan tetasujtalis ne nemi ijtik ne Mawaltijtuk
Yeshu. 14 Shitajpia ne yek talilijtuk iwan ne Ijiutzin
ne muchantia ijtik tejemet.
15 Tikmati ken nechajkawtiwit muchi tik Asia;
ijtik yejemet, Pugelos wan Hermogenes. 16 Ma kinpalewi ne Tajtzin muchi ichan
Onesiporos ika seuseujti nechpalewij wan te ishpinajki ipanpa ne
nutejtepusilpika; 17 kwak nemik tik Roma munelwij nechtemua wan
nechajsik. 18 Ma kiajkawa ne Tajtzin ma kiajsi tepalewilis
itech ne Tajtzin tik uni tunal, wan tikmati yek keski tekit kichijki tik
Epesos.
|
Ne
Bibliaj TIK NAWAT |
Ini ijiswat muitat mas
yek iwan Windows 7 |
© 2012, Ne Bibliaj Tik Nawat © Jan Morrow |