|
Ne Bibliaj TIK NAWAT |
2 Timoteo |
|
2 |
1 Taja tel, nukunew, shichikawaya iwan ne
tetasujtalis ne nemi ijtik ne Mawaltijtuk Yeshu, 2 wan tay ne tikaktuk nutech tik itachialis
miak, uni shikinhilwi takamet ne tayulmatit pal kiane yejemet nusan welit
kinmachtiat sejseuk.
3 Shitaekua taja nusan ken se yek tasumani ipal
ne Mawaltijtuk Yeshu. 4 Se tasumani te keman mukwelpachua ijtik ne
tay kichiwat muchi ne takamet, pal kiane weli kipaktia ne kitekimaka. 5 Nusan se mutaluani su te muishnamiki ken
muneki, te yawit kimakat premioj. 6 Ne talchiwani ne kujkutia, nemi pal kiejekua
ne itakil ne achtu. 7 Shikejketza tay ne nina, ika ne Tajtzin
metzmakas tamatilis tik muchi.
8 Shikelnamiki ka Yeshu Mawaltijtuk muyulkwij
kwak miktuya, ne ishinach David, ken ina ne nuyeknawatilis. 9 Melka nitaekua ipanpa hasta ma nechilpijtiwit
ken se teyekchiwani, inte weli muilpia ne ipalabraj ne Teut. 10 Neka nikselia muchi ka inmaku ne ijishpejpentuk,
pal kiane yejemet nusan yawit kipiat tamakishtilis ne nemi ijtik ne Mawaltijtuk
Yeshu pal senpa tzitzinaka. 11 Ini tejkia, ka:
Su
timiktiwit iwan,
nusan tiawit
tiyujyultuk iwan;
12 su titaekuat,
nusan
titatuktisket iwan;
su
tiknaktiat,
yajuni nusan
technaktis.
13 Su te tikyulmatit,
yaja
kenhayuk yawi melawak
ika te weli
munaktia.
14 Muchi ini shikinhelnamikti wan shikinnawati
tik itachialis ne Teut ma inte musumakan iwan pajpalabraj: te techpalewia pal
tatka, sema pal muishtapachuat ne takakit. 15 Shimutatemuili pal tikisa iishpan ne Teut ken
yaja kita yek, ken se tekitini ne te kipia taika ishpinawaskia, ne tamachtia
ken melawak ne yekkaya palabraj. 16 Shikajkawa muchi tay tajtaketzat ne te kipia
ipatiw, ika itech semaya yawi kisa mas tay teyek, 17 wan ne tay taketzat yawi mulini ken se
gangrenaj. Uni muchijki iwan Humenayos wan Piletos, 18 ká ne kiajkawtiwit ne ujti ipal ne tejkia ika
inat ka ne muyulkwepalis muchijkia, wan inpanpa tea tayulmatit sejse. 19 Melka uni, ne yek tetzilnaj ipal ne Teut naka
ejkatuk wan kipia ini ken selloj: “Ne Tajtzin kishmati ká ne ipal”, wan nusan: “Ma
te kichiwakan tay teyek muchi ká kitukaytiat ne itukay ne Tajtzin”.
20 Tik se wey kal, te nemit semaya tajtaijtik
ipal teukwit wan tumin, nusan nemit sejseuk ipal kwawit wan sukit, sejse ipal
honor wan sejse inte. 21 Yajika tel, su se muishtilia ne tay te
yejyek, yaja muchiwas se taijtik ipal honor, teuchijtuk, ne kipia ipatiw ipal
ne itekuyu, ekchijtuk ipal muchi ne itekiw yejyek.
22 Shichulu itech ne intajtaelewilis piltzinmet;
shiktemu tamelakchiwalis, tayulmatilis, yek, nejmachnemilis iwan yejemet ká
kinutzat ne Tajtzin iwan inyujyulu yek. 23 Maka shikaki ne intajtajtanilis ne melemet
wan ne te kimatit tatka ika tikmati ka kichiwat kwajkwalan. 24 Itekitini ne Tajtzin te nemi pal kwalani sute
muneki ma muwika yek inwan muchi, ma kinmachti, ma kiseli melka te yek; 25 ma kinhiskali iwan yulyamanikayu ne inte
kinekit, wan anka ne Teut yawi kinmaka yulpatalis pal kishmatit ne tejkia, 26 wan pal nejmachnemit wan pal chuluat tik ne
itajpewal ne Tamintuk, ká ne kintilan ika yajuni kielewij.
|
Ne
Bibliaj TIK NAWAT |
Ini ijiswat muitat mas
yek iwan Windows 7 |
© 2012, Ne Bibliaj Tik Nawat © Jan Morrow |