Ne Bibliaj Tik Nawat

Ne Bibliaj

TIK NAWAT

2 Timoteo

1 Shikmati ini: ka tik ne tijtipan tunal walasket ujuij tiempoj, 2 ika ne takamet yejemetsan insel mutasujtasket, muchiwasket tumintasujtat, muweytenewasket, muweymatisket, kukujtaketzasket, te kitakamatisket intejteku, te inasket panpadiush, kichiwasket tay te muneki, 3 te kipiasket tetasujtalis, te kinekisket sentajtaketzat, tatejtenewasket, muajkawasket, muwikasket ken tekwanimet, te kielewisket tay yek, 4 muchiwasket temakanimet, tzunhejekamet, tzujtzunsuluntuk, sejse sema kinekit mukwesuat wan te kitasujtat ne Teut, 5 sejse kipiat tachialis ipal yek wan te kinekit kipiat itajpal. Maka shikpia tatka inwan.

6 Ijkiuni nemit ne kalakit tik ne kajkal wan kikwit ijilpituk siwatzitzin tajtakimiltijtuk iwan tejteyekchijtuk ika ankakeski taelewilis kinwikatiwit. 7 Senpa mumachtiat nemit wan te keman welit ajsit ne yekkaya taishmatilis. 8 Ken Yanes wan Yambres ne kinajnankilijket Moshe, ijkiuni yejemet nusan nankilijket iishpan ne tejkia. Wilewik ne intamatilis, te yejyek pal tayulmatit. 9 Tea yasnekit inhishpan, ika muchi kimatisket ne inkwalan, ken muchijki iwan ne sejseuk.

10 Taja tikishmati yek nutamachtilis, numuwikalis, nuajshitilis, nutayulmatilis, nuweytejchialis, nutetasujtalis, nutanejmachselilis, 11 ken nechtalultijtiwit wan ken nitaekujtuk tay muchijtuk nuwan tik Antiokea, tik Ikonion, tik Lustra. Muchi uni nitaekujtuk wan ne Tajtzin nechpalewij. 12 Wan muchi ká kinekit nemit ken yek iwan ne Mawaltijtuk Yeshu, mutalultisket. 13 Takamet te yejyek wan tashijshikuanimet yawit mukwepat mas te yejyek; tashijshikusket wan mushijshikusket.

14 Taja tel shinaka iwan tay ne timumachtijtuk ika tikmati ká itech timumachtij, 15 wan hasta kwak tishulut katka tikmatki ne amamatilis ipal ne teupan ne weli metzmachtia ken welit timumakishtiat iwan tayulmatilis ipal ne Mawaltijtuk Yeshu. 16 Muchi tay ijkwilujtuk walaj itech Teut wan techpalewia pal titamachtiat, pal tikajsit tajtaika, pal tikmelawat tay muneki, pal titanawatiat tay yek, 17 pal muajshitia wan nemi ekchijtuk ne takat ipal ne Teut pal kichiwa muchi ne itekiw yek.

Ne Bibliaj

TIK NAWAT

· NE BIBLIAJ TIK NAWAT

· 2 Timoteo

· 2 Timoteo tik ukse taketzalis

Ini ijiswat muitat mas yek iwan Windows 7