Ne Bibliaj Tik Nawat

Ne Bibliaj

TIK NAWAT

Epesos

NE TAJKWILUL IPAL NE TUKNIWAN IPAL EPESOS

Epesos

1 Naja, Pawlo, ititanijtuk ne Mawaltijtuk Yeshu ipanpa itaelewilis Teut, niktuktia ini tajkwilul itech ne tukniwan ne kiyulmatit ne Mawaltijtuk Yeshu. 2 Ma metzinmaka ne Teut ká ne tuteku, wan ne tajtzin Yeshu Mawaltijtuk, tetasujtalis wan nejmachnemilis.

Tayektenewalis

3 Yektenejtuk ne Teut,

n’ iteku tutajtzin Yeshu Mawaltijtuk,

ne techteuchij iwan muchi ne tajtayektenewalis ipal n’ Ijiutzin,

tik ilwikak ka ikajku,

tik ne Mawaltijtuk.

4 Techishpejpen ijtik yaja achtu ka mutzintij ne taltikpak

ma timuchiwakan ipal Teut,

ma inte tikpiakan nian se tupelech tik itachialis

ipanpa itetasujtalis.

5 Yaja tatuktij kwak pejki muchi

ka tiawit timuchiwat ikukunew

ipanpa Yeshu Mawaltijtuk

ken yaja kinekik wan kitak yek,

6 pal kiane inat ka yek

itawilyu n’ itetasujtalis;

yajika techmakatuk itetasujtalis

ijtik ne tasujtatuk,

7 ká ipanpa tikpiat tamakishtilis tik n’ iesyu,

wan tetapupulwilis ipal tay tikchijtiwit teyek,

ika sujsul wey n’ itetasujtalis,

8 wan techtepewilijtuk iwan wey tamatilis

9 pal tikmatit ne ichtaka ipal n’ itaelewilis,

ken yaja kitztuk yek wan inatuk ka yawi kichiwa

10 pal kiane, kwak yekajtiwit ne tujtunal,

ma kisentepewa, itech ne Mawaltijtuk,

muchi tay nemi tik ilwikak wan pak tal ijtik yaja.

11 Tejemet nusan, inatuk ka yawi techtakulia se tay tupal,

ken iajshitilis ne ká kichiwa muchi,

ken yaja kinekik ika ijkiuni munawatijtuk,

12 pal kiane tiawit tinemit pal tinat ka wey n’ itawilyu

ne ajachtu ká kiyulmatket ne Mawaltijtuk,

13 ká ne anmejemet nusan antakaktiwit ne palabraj tejkia,

ne yeknawatilis ipal ne anmutamakishtilis,

wan ankiyulmatket,

wan anmutetilijket iwan n’ Ijiutzin ken sentaketztuk,

14 ne achtu takutun ipal tay yawi tupal

hasta ma tikpiakan muchi

pal inat ka yek wan inat ka wey!

Tutajtzin Yeshu Mawaltijtuk

15 Neka naja, ashan ka nitakaktuk ken ankiyulmatit ne Tajtzin Yeshu, wan ken ankitasujtat muchi ne tukniwan ne tayulmatit, 16 nina senpa panpadiush anmupanpa wan nimetzinhelnamiki tik ne nuteujteutajtanilis, 17 ma metzinmaka ne Teut ipal ne tutajtzin Yeshu Mawaltijtuk, ne Teteku tzitzinaka, ne Ijiutzin pal ankishmatit iwan tamatilis wan taneshtilis 18 wan ma kitawilu ne anmuijish wan ne anmuyujyulu pal ankishmatit ne tejchialis ipal ne itanutzalis, wan ken sujsul wey tay yawi kinmaka ne tayulmatit, 19 wan ken tetekia wey ne itajpal tupal tejemet ká titayulmatit ipanpa ne itekiw ne kichijtuk iwan ne itajpal wey, 20 tay yaja kichijki itech ne Mawaltijtuk: yajika kiyulkwepki kwak miktuk wan kitalij ka imayekkan tik ne ilwikak ka ikajku, 21 mas ikajku que muchi ne tatuktianimet, wan muchi tay yejemet welit wan tatuktiat, muchi ne intajtzinkayu wan muchi ne intujtukay ne mutaliliat, te semaya tik ini taltikpak, nusan hasta tik ne tujtunal pal ne musta. 22 Yaja muchi kituktijtuk itan ne ijikshi wan yajasan mutalij itzunpan muchi ne sennemit. 23 Ne sennemit ne iweyka wan ne tepewilis ipal yajane ká kitema muchi ijtik muchi tejemet.

Ne Bibliaj

TIK NAWAT

· NE BIBLIAJ TIK NAWAT

· Epesos

· Epesos tik ukse taketzalis

Ini ijiswat muitat mas yek iwan Windows 7