Ne Bibliaj TIK NAWAT

Epesos

Ne itetasujtalis ne Mawaltijtuk techpalewia

2

1 Anmejemet nusan! Achtu anmiktuyat ipanpa muchi tay ankichijket tay teyek, 2 ika anmuwikaket ken muchi tay ipal ini taltikpak, ken ne ká tatuktia iwan ne itajpal ne ejekat ipal ne iijiu ne ashan tekiti ijtik yejemet ká inte tayulmatit, 3 wan tejemet kenhaya timukweptuyat niakeman, itzalan yejemet, tikchiwat tay kielewia ne tunakayu wan tay tikpiatuyat tik tuyulu, wan tejemet, kenha ken ne sekit, tinestiwit ken kukunet ipal ikwalan Teut. 4 Melka uni, ne Teut kineki techpalewia ika techtasujta iwan wey tetasujtalis. 5 Yajika, kwak timiktuyat ipanpa tay tikchijket tay teyek, yaja techyulkweptuk iwan ne Mawaltijtuk. Ne itetasujtalis metzinpalewijtuk. 6 Wan iwan ne Mawaltijtuk Yeshu, techketztuk wan techtalijtuk tik ne ilwikak ka ikajku, 7 pal kiane, tik tujtunal witzet, ma muilwiti ka tetekia wey ne itetasujtalis wan yajika techchiwilijtuk tay yek itech ne Mawaltijtuk Yeshu, 8 ika iwan tetasujtalis anmupalewijtiwit ipanpa tayulmatilis, wan te anmusel, sute ne Teut metzintakulij, 9 tesu ipanpa anmutekiw, pal te aka muweymati, 10 ika tejemet techchijtiwit wan techketztiwit itech ne Mawaltijtuk Yeshu ipal ne yejyek tutekiw ne kiekichijtuk ne Teut ken yaja inatuk ka tiawit tikchiwat.

Ken sesan tik ne Mawaltijtuk

11 Yajika, shikelnamikikan ka anmejemet, ne tejtechan tik anmunakayu, ká ne metzinhilwiat katka “tzuntepulmet” ne muilwiat “yajyawaltektuk” ipanpa tay kichijtuk se imey tik innakayu, 12 ikman te ankipiatuyat Mawaltijtuk, teuk ankishmatit katka Israel, wan te annemituyat ijtik ne sentaketzat ipal ne promesaj, nian ankipiatuyat tejchialis nian Teut tik ne taltikpak. 13 Ashan, anmejemet ká ikman nemituyat wejka ne Mawaltijtuk Yeshu anmuchijtiwit sejse ká nemit inawak, iwan ne iesyu ne Mawaltijtuk, 14 ika yajaya ne tunejmachnemilis, ne kikweptuk ne ujume ken sesan, ne kitajkaltuk ne tapepechul tik itajku, kineki ina ne taishijialis, tik ne iweyka 15 wan kipulujtuk ne tajtuli ipal tajtatuktilis ne mutuktijtiwit, pal kiane kinketza ne ume ijtik yajasan ken sanse yankwik takat wan kalwika nejmachnemilis, 16 wan pal techsenputzua ne tuumeshtin tik sanse tuweyka iwan ne Teut, itech ne cruz, wan kimiktia ne taishijialis ijtik yajasan, 17 wan walaj metzinmaka ne yeknawatilis ipal nejmachnemilis anmupal, ne nemituyat wejka, wan nusan ipal ne nemituyat inawak; 18 ika ijtik yaja, ne tuumeshtin tikpiat ne ujti tik sanse Ijiutzin pal tiajsit itech ne Teteku.

19 Kiane tel, teuk anhejkunimet, ashan antechanchanejket iwan ne tayulmatit, anmejemet sejse ipal ne ikal ne Teut 20 ne muketztiwit ijpak ne tetzilnaj ipal ne tijtitanijtuk wan taketzanimet, wan ne Mawaltijtuk Yeshu ne tzintet 21 pal ijpak, asu mupiki yek, muchi ne kal yawi weya wan mukwepa se teupan ipal ne Tajtzin Teut, 22 wan pal anmejemet nusan yawit muketzat wan mukwepat se muchantiluyan ipal ne Teut ijtik ne Ijiutzin.

Ne Bibliaj TIK NAWAT

· NE BIBLIAJ TIK NAWAT · Epesos · Epesos tik ukse taketzalis

Ini ijiswat muitat mas yek iwan Windows 7

© 2012, Ne Bibliaj Tik Nawat © Jan Morrow