Ne Bibliaj Tik Nawat

Ne Bibliaj

TIK NAWAT

Epesos

Pawlo tajpia ne teutasujtalis ipal ne tejtechan

1 Ipanpa uni, naja, Pawlo ne ilpituk ipal ne Mawaltijtuk, anmupal, ne tejtechan, nina:

2 Asu antakaktiwit ken nechmakaket ne tajpialis ipal ne teutasujtalis anmupal, 3 ken nechneshtilijtiwit pal nikmati ne ichtaka, ken ninak achtu 4 pal kiane, kwak anhamataketzat, welit ankimatit ken ka naja nikishmati ne ichtaka ipal ne Mawaltijtuk, 5 se tay te kinneshtilijket ne takamet wan siwatket pal ikman ijkiuni ken ashan kinneshtilijket ne tijtitanijtuk ipal Teut wan ne taketzanimet itech ne Ijiutzin: 6 ka ne tejtechan nemit pal kipiat tay ipal, wan yejemet ipal sanse inweyka wan muchi yejemet tukunpawan ipal ne promesaj ipanpa ne Mawaltijtuk Yeshu, ika tikpiat ne yeknawatilis. 7 Yaja taika nitekiti, ika ne Teut tik itetasujtalis nechtakulij nutekiw ma nikchiwa wan ma nechpalewi; 8 melka te nitatka ijtik muchi ne takamet wan siwatket ipal Teut, naja nechmakak uni teutasujtalis, ma nikinmaka ne tejtechan ne yeknawatilis ipanpa muchi tay ipal ne Mawaltijtuk ne inte aka weli kimati, 9 wan ma nikintawilu muchi pal kitat ne tajpialis ipal ne ichtaka ne minashtuk ikman wan hasta ashan ijtik ne Teut ne kichijki muchi, 10 pal kiane welit kinneshtiliat ne tatuktianimet wan ne tatekimakat tik ne ilwikak ka ikajku, itech ne sennemit, ne itamatilis ne Teut ipanpa muchi, 11 ken iajshitilis pal senpa, itech ne Mawaltijtuk Yeshu, ne tutajtzin, 12 ká iwan tikmatit ka tikpiat ne ujti melaknaj hasta yaja ika tikyulmatit.

13 Neka niktajtani ma inte shikakasiwikan ipanpa ne nupejpenaj ka anmumaku; anyawit tzitzinakat inpanpa.

Se teutajtanilis

14 Yajika nimutankwaketza iishpan ne Teteku 15 ká itech kisket wan mutukaytiat muchi ne tejtechan tik ne ilwikak wan pak ne tal, 16 ma kichiwa, ken yaja kipia muchi itawilyu, ma shichikawayakan iwan itajpal ipanpa ne iijiu tik ne takat o siwat ne tikpiat ijtik tejemet, 17 pal kiane yawi muchantia ne Mawaltijtuk, ipanpa tayulmatilis, ijtik anmuyujyulu wan yawi kipia inelwayu wan itetzilnaj tik tetasujtalis, 18 pal welit ankishkejketzat yek, iwan muchi ne tayulmatit, ken yaja patawak, wan weyak, wan kojtik wan miktan, 19 wan pal welit ankishmatit ne itetasujtalis ne Mawaltijtuk ne inte weli mumati ken wey, pal ma shitemikan iwan muchi ne itepewilis ne Teut.

20 Ne weli muchi wan weli kichiwa sujsul mas que tay ne tiktajtaniliat wan tiyultaketzat iwan ne tutajpal ne tekiti ijtik tejemet, 21 ma tzitzinaka tik ne sennemit wan tik ne Mawaltijtuk Yeshu ashan wan senpa. Amen!

Ne Bibliaj

TIK NAWAT

· NE BIBLIAJ TIK NAWAT

· Epesos

· Epesos tik ukse taketzalis

Ini ijiswat muitat mas yek iwan Windows 7