|
Ne Bibliaj TIK NAWAT |
Epesos |
Shiktasujta
ne mutejteku wan ne mutekuyu
|
6 |
1 Ne kukunet, shiktamatikan ne anmutejteku
ipanpa ne Tajtzin ika yaja tay yek. 2 Ken nemi ijkwilujtuk:
“Shiktakamati
muteku wan ne munan.”
Wan yaja ne
achtu tuktijtuk iwan se promesaj, ika ina:
3 ”...pal tinemi yek wan weli tikita miak
shiwit ijpak ne tal.”
4 Wan ne tetekuwan, maka shikwalantikan ne
anmukukunew; shikinhiskalikan wan shikinnawatikan yek.”
5 Wan anmejemet ne tepaltekitinimet,
shiktakamatikan ne ká anmutejtekuyu ipal anmuweyka iwan mawi wan ijtzilikalis,
wan shimuchiwakan yujyulkanawak ken ne Mawaltijtuk. 6 Maka shitekitikan pal metzinhitat, ken
kichiwa ne ká kineki ma kitakan yek ne sekit. Shimuchiwakan ken itejtekitini ne
Mawaltijtuk, wan shikchiwakan ne itaelewilis ne Teut iwan muchi anmuyulu. 7 Shitekitikan iwan pakilis, ken antekitiskiat
ipal ne Tajtzin wan tesu ipal tajtakamet, 8 wan shikmatikan ka tay ne se kichiwa tay yek,
yaja tay yawi kikwi itech ne Tajtzin, su yaja tepaltekitini wan nusan su te. 9 Wan ne itejtekuyu tepaltekitinimet,
shikchiwakan kenha inwan. Maka shikinmujmutikan. Shikmatikan ka ne ká nemi tik
ne ilwikak yaja intajtzin wan anmutajtzin kenhaya, wan muchi ankenhat ipal.
Ken nemi pal
titasumat
10 Pal tami, shichikawayakan iwan ne Tajtzin wan
iwan ne itajpal. 11 Shumet shimutzakwakan iwan muchi ne
itajtaiwan ne Teut pal welit annakat ejkatuk iishpan ne itajtajpewal ne
Tamintuk, 12 ika te timutajtasat iwan se ken tuweyka ipal
esti wan nakat sute iwan ne tatuktianimet, iwan ne tatekimakat, iwan ne kipiat
intajpal ipal takumi ijtik ini taltikpak, iwan ne nawaltal teyek né tik ne
ilwikak ka ikajku. 13 Yajika, shikanakan ne itajtaiwan ne Teut pal
welit antasumat tik ne tunal teyek, wan pal welit annakat ejejkatuk kwak tamit
ankichiwat muchi tay muneki.
14 Yajika tel, shimumashtatzakwakan iwan ne
tejkia, wan tik anmuelpan shikwikakan ne tamelakchiwalis, 15 wan ne anmukak tik anmujmukshi, yaja ka
anyawit muekchiwat iwan ne yeknawatilis ipal nejmachnemilis. 16 Shikanakan tik anmumey ne tepustzakka ipal ne
tayulmatilis, pal iwan anwelisket kisewiat muchi ne mijmit tatat ipal ne inteyek,
17 wan shikwikan ne tzuntzakka ipal ne
tamakishtilis wan ne espadaj ipal ne Ijiutzin, kineki ina ne ipalabraj ne Teut,
18 wan shitajtanikan wan shimutajtawelikan iwan
ne Teut mujmusta, itech ne Ijiutzin, wan shikishpelwikan senpa wan
shiteutajtanikan ipanpa muchi ne tayulmatit; 19 wan nusan nupanpa, shitajtanikan ma nikmati
tay ninaskia kwak nimutenpelua ishpan muchi pal nitaneshtia ne ichtaka ipal ne
yeknawatilis 20 pal nikchiwa nutekiw, melka ninemi
tepusilpituk, wan pal niweli nitanawatia melaknaj ken muneki.
Tami
21 Pal nusan anmejemet kimatit ken ijtuk nuwan
wan tay nikchiwa, weli metzinhilwia muchi Tukikos, nuiknew yektasujtatuk, se
yek tekitini ipal ne Tajtzin, 22 ká ne niktuktijtuk anmutech pal ma
shikmatikan ken ijtuk tutech wan pal kinapalua anmuyujyulu.
23 Tuteku ne Teut wan tutajtzin Yeshu
Mawaltijtuk ma metzinmakakan nejmachnemilis, wan tetasujtalis iwan
tayulmatilis. 24 Ma kipiakan teutasujtalis muchi ne ká
kitasujtat ne tutajtzin Yeshu Mawaltijtuk, ne te keman wilewi.
|
Ne
Bibliaj TIK NAWAT |
· Epesos |
Ini ijiswat muitat mas
yek iwan Windows 7 |
© 2012, Ne Bibliaj Tik Nawat © Jan Morrow |