Ne Bibliaj TIK NAWAT |
Ebrayujmet |
9 |
1 Ne achtu nusan kipiatuya sejse tay
mutuktijtuyat ipal tekitilis tik ne tiupan wan nusan ipal ne tiupantzin. 2 Muekchijki se tawipanti, ne achtu, wan ijtik
yaja nemituyat ne tawilkal wan ne tepatznaj wan tajtamal ishpanujtuk; uni
muilwia ne Tiupan; 3 wan kan tipanut ijtik ukse kwachtzakka, se
tawipanti ne muilwia ne Tiupantzin, 4 ne kipia se pupuchkashit ipal teukwit wan ne
takukal ipal ne sentaketzat ishtzaktuk nujme iwan teukwit, wan ijtik uni ne
kumit ipal teukwit ne kipia ne manaj wan ne itupil Aaron ne mulinik, wan ne
tejtepatznaj ipal ne sentaketzat. 5 Ijpak uni, kerubmet tzitzinakat, wan tik
inhekawyu nemi ne tapupulwian. Ashkan inte welit titaketzat ipanpa muchi uni.
6 Kwak muekchijtuk ijkiuni, ne palejmet kalakit
katka sejsenpa tik ne achtu tawipanti pal kichiwat ne tejtekitilis; 7 tik ne ukse tawipanti isel ne weypalej seujti
tik ne shiwit, wan nemi pal kishinia esti ipanpa yajasan wan ne
mujmuishpululisyu ne techan. 8 Ini tay kineki ina ne Ijiutzin: inteuk
muneshtijtuk ne ujti ipal ne tayulmatit kwak kenhayuk naka ejkatuk ne achtu
tawipanti. 9 Yajini se casoj ipal ne tujtunal pal ashkan,
kan walmuwikat tejtetakulis ne inte welit kiyektiat tik itasenmatilis ká ne
kichiwa uni tekitilis, 10 ne tachiat sema tay ipal ne takwal, ne tay
tikunit, wan tajtapakalis wan tay ne mutuktijtuk ipanpa tuweyka, hasta ne
tujtunal ipal tamelawalis.
11 Kwak ajsik ne Mawaltijtuk ken weypalej ipal
muchi ne yek tay muchijtuk iwan se tawipanti mas wey wan mas yek, ne inte
kichijtiwit ne ijimey aka, ne kineki ina ka inte ipal muchi ini tay muchijtuk, 12 intesu kalwikak iesyu cabrajmet wan wakashmet
pal kalaki ijtik ne Tiupan asunte iesyu yajasan, kwak tamik kiajsi
tamakishtilis pal senpa; 13 ika asu ne iesyu cabrajmet wan tujturuj wan
ineshyu wajwakashkunet shinijtuk ijpak ne tay mususulwijtuk tateuchiwa pal
tikpupuat ne tunakayu, 14 keski mas ne iesyu ne Mawaltijtuk, ká inte
kipiatuya nian se ipelech wan mutakulij ipal ne Teut ipanpa se iijiu inte miki,
yawi kipupua ne tutasenmatilis pal tikajkawat tutejtekiw ne inte yujyultuk, pal
titekitit ipal ne Teut yultuk!
15 Wan yajika yaja tajkutaketzani ipal se
yankwik sentaketzat pal kiane, ken mikik pal kinmakishtia ne tateyekchijtiwit
itan ne achtu sentaketzat, ne munutztiwit yawit kikwit ne tay muchijki
prometer. 16 Ika kan se kiajkawa se testamentoj, muneki ma
miki ne ká kiajkawa, 17 ika se testamentoj mukejketza yek kwak
timiktiwit: ne testamentoj inte weli tatka kwak ne ká kichiwa kenhayuk yultuk. 18 Neka inte muyankwilijtuk ne achtu asunte iwan
esti, 19 ika kwak Moshe tamik kilwia muchi ne techan
muchi ne tajtatuktilis ken ina ne tajtuli, kikwij ne iesyu ne wajwakash wan ne
cajcabraj iwan at wan chiltik ichkat wan se majtzal, 20 wan inak: “Ini ne esti ipal ne sentaketza ne
metzintuktij ne Teut.” 21 Yaja nusan kishinij ne esti ijpak ne
tawipanti wan muchi ne tajtaiwan ipal ne tekitilis kenhaya, 22 wan ajatzika muchi mupupua iwan esti ken ina
ne tajtuli, wan te nemi tetapupulwilis asu inte mushinia esti.
23 Yajika munekik ma mupupukan muchi ne tay ken
tay nemi tik ne ilwikak, wan ne tay ipal ne ilwikak iwan tejtetakulis mas
yejyek. 24 Ne Mawaltijtuk inte kalaktuk ijtik ne tiupan
ne kichijtiwit ne ijimey sejse tay ken tay nemi tik ne ilwikak wan yekkaya,
asunte kalaktuk ijtik ne ilwikak pal muneshtia ashkan tik itachialis ne Teut ka
tumaku: 25 intesu ma muishpanu yajasan seujseujti ken ne
weypalej ne kalaki tik ne tiupan muchi ne shijshiwit iwan iesyu sejseuk; 26 kwakuni nemiskia pal yaja pewa taekua kwak
pejki ne taltikpak wan hasta ashkan. Sema seujti muneshtijtuk ashkan kwak tami
yawi ne taltikpak pal muelkawa ne tay muchijtuk tay teyek. 27 Wan kenha ken nemi pal mikit seujti ne
takamet, wan tipan yawi muchiwa juzgar, 28 ne Mawaltijtuk nusan ijkiuni, seujti mutemakak
pal kiwika ne tejteyekchijtuk. Tipan yawi muita senpa kwak inte kipia
tejteyekchijtuk pal mumakishtiat ne kichiat.
Ne
Bibliaj TIK NAWAT |
Ini ijiswat muitat mas
yek iwan Windows 7 |
© 2012, Ne Bibliaj Tik Nawat © Jan Morrow |