Ne Bibliaj Tik Nawat

Ne Bibliaj

TIK NAWAT

Matay

Kipajtij se shinpiani

1 Kwakuni waltemuk ne tapetat wan miak senyajket iwan, 2 wan né nemik se kukuya kipia shinyu ká ajsik mutankwaketza wan ina:

—Tajtzin, asu tikneki weli tinechpajtia.

3 Wan kimelawki ne imey wan kimatukak wan ina:

—Nikneki. Shimupajti.

Wan mupajtija nemanha ne ishinyu. 4 Wan ne Yeshu kilwij:

—Maka shikilwi aka, sema shiawa shikilwitili ne palej wan shiktakuli ne mutetakulis ken tatuktij Moshe, ma kitakan.

Ne sentzuntuktiani iwan se ipiltzin kukuya

5 Kwak ajsik Kaparnajum, se sentzuntuktiani ajsik itech mutajtawelia, 6 ina:

—Tajtzin, ne nupiltzin mutekatuk ka nuchan te weli mijkwani wan kikukua tetekia sea.

7 Wan ina:

—Niasneki nikpajtia?

8 Wan ne sentzuntuktiani nankilij:

—Tajtzin, naja inte nitatka pal tikalaki ijtik ne nukal; sema shina se mupalabraj wan mupajtis ne piltzin. 9 Ika naja nusan nitakat tuktijtuk, wan nikpia ka nuitan tasumanimet, wan naja nikilwia ne se:

“Shu!”

wan yaja yawi, ne seuk:

“Shiwi!”

wan yaja witz, wan ne nutekitini:

“Shikchiwa!”

wan yaja kichiwa.

10 Yeshu kikakik wan ishpuyawik, wan kinhilwij ne senyawit iwan:

—Kia nimetzinhilwia ka tayulmatilis ken ini inte nikajsik itech aka pal ne tukniwan ipal Israel! 11 Nimetzinhilwia ka miak walasket ka nujme ne tal, wan musentalisket iwan Abraham wan Itzak wan Yakob tik ne tatekimakalis ipal ne ilwikak; 12 saman yawit kinhishtiat ne ipilawan ne tatekimakalis, kintamutasket ka tatenpan kan kunyua wan né kinhajkawasket, wan ikuni yawit chukat wan tzalanit intajtan.

13 Wan Yeshu kilwij ne sentzuntuktiani:

—Shiawa. Ika tayulmatki, muchijki.

Wan mupajtij ne piltzin tik uni horaj.

Ne inan ne isiwaw Pedro

14 Wan Yeshu kalak ichan Pedro, wan kitak ne inan ne isiwaw wetztuk iwan tutunkayu, 15 wan kimatukak ne imey wan kishtilij ne tutunka wan ne siwat kitakwaltij.

16 Kwak tayuakik kalinwikaket miak nawalpiat wan yaja taketzki wan kinhishtij ne najnawal, wan kinpajtij muchi ne kukuyat, 17 pal kiane yekawi tay inak Ishaya ne taketzani, ina:

“Yajuni kikwij wan techishtilij tusutawalis wan tukujkukulis.”

Yajki tik se barcoj

18 Kwak Yeshu kitak ne miaktal inawak, inak tipanukan sentapal ne at. 19 Wan se tajkwiluani ajsik itech, kilwij:

—Tamachtiani, niasneki muwan kanka tiaw.

20 Wan ne Yeshu kilwij:

—Ne tepetzkwinti kipia n’ ishapu wan ne tutut n’ itapajsul;

n’ Itelpuch ne Takat te kipia kan musewiskia itzuntekun!

21 Seuk mumachtiani kilwij:

—Tajtzin, achtu shinechajkawa niaw niktalpachua nuteku.

22 Ne Yeshu kilwia:

—Shiwi nuwan, shikinhajkawa ne mikinimet kitalpachuat n’ inmijmikini.

23 Wan yaja kalak tik ne barcoj wan ne imujmumachtiani yajket iwan, 24 wan né ulinik ne at wan ne at kitzak ne barcoj, wan yaja kuchi nemi. 25 Wan ajsiket kishatiat, inat:

—Tajtzin, shitechpalewi, tipuliwit!

26 Wan kinhilwia:

—Ansajsaytit! Inte ankipiat tayulmatilis!

Kwakuni muketzki, kinhajwak ne ejekat wan ne at wan nejmachnemik. 27 Ne takamet ishpuyawiket, inat:

—Ká ini? Ne ejekat wan ne at kitakamatit!

Yeshu tapajtia tik Gadara

28 Wan ajsik sentapal ne at kan nemi ne tal pal Gadara, wan kisket tik ne panteon ume nawalpiat chujchucaroj ken te aka welituya panu tik uni ujti, 29 wan né tzajtziket inat:

—Tay tikneki tuwan, Itelpuch ne Teut? Tiwalaj nikan achtu ka muneki titechchiwilia tay techkukua?

30 Né wejka nemituya se wey kuyantal mutakwaltia. 31 Ne nawalmet mutajtawelijket iwan inat:

—Asu titechishtia, shitechtukti tikalakit itech ne kuyantal!

32 Wan kinhilwij:

—Shiakan.

Yejemet walkisket, kalakket ijtik inwejweyka ne kujkuyamet, wan kiski mutalua muchi ne kuyantal, muustutaminket wan wetzket tik ne weyat. Mikiket. 33 Ne tajpianimet chulujket; yajket tik ne techan wan inaket muchi ne chanejket tay panutuk wan ken ijtuk wan ne nawalpiat, 34 wan kisket muchi ne techanchanejket kinamikit Yeshu wan kwak kitaket kitajtanket ma yawi wejka ne intechan.

Ne Bibliaj

TIK NAWAT

· NE BIBLIAJ TIK NAWAT

· Matay

· Matay tik ukse taketzalis

Ini ijiswat muitat mas yek iwan Windows 7