|
Ne Bibliaj TIK NAWAT |
Pilipoy |
|
2 |
1 Yajika, su nemi tepalewilis tik ne
Mawaltijtuk, wan tetasujtalis pal timumatit yek, wan tasentepewalis ipal ne
Ijiutzin, wan yulkukulis wan taeknelilis, 2 shinechtemakan iwan pakilis, ma
shikishkejketzakan kenha, ma shitatasujtakan kenha, ma shimumatikan kenha. 3 Te tatka pal kitemua tay kineki sejse, te
tatka sema pal muweymati, sute iwan kanawakmatilis ma kita sejse ka ne seki mas
wey que yaja. 4 Ma te kishkejketza sejse tay ipal, sute tay
tepal nusan. 5 Shimumatikan ijtik anmejemet, tay ne nusan
ijtik Mawaltijtuk Yeshu, 6 ká:
Kwak tik
iweyka Teut
te kitak ken
se pal kitzkia
ma kenha ken
Teut,
7 sute yaja kikwij iweyka
se tekitini
te tatka ipatiw,
muchijki ken
se takat
kipia muchi
tay kipia takat;
8 mutemultij, muchijki tetakamatini
hasta
mikilis, mikilis ijpak cruz.
9 Neka hasta ne Teut kiajkukij
wan
kitakulij se itukay
ijpak muchi
ne tutujtukay,
10 pal ma mutankwaketzakan muchi
ka ilwikak
wan pak tal wan tik miktan,
11 wan ma inakan ka tejkia
ka Yeshu
Mawaltijtuk tutajtzin
pal
tzitzinaka Teut ne tuteku.
12 Kiane, nukujkunpawan yektasujtatuk,
ijkiunisan ken senpa annechtakamattiwit, te sema ken kwak ninemik anmuwan sute
sujsul mas ashkan kwak te ninemi, shimajmawikan wan shijtzilikakan pal
anmupalewikan, 13 ika ne Teut ká ne tekiti ijtik anmejemet pal
ma shiknekikan wan ma shikchiwakan ne tay yaja kita yek.
14 Muchi tay ankichiwat, maka shikikinakakan
nian shitajtanikan tatka kwak ankichiwat, 15 pal anmuchiwat ikujkunew Teut yujyulyamanik
ká inte kichijtiwit tatka tay teyek wan inte kipiat nian se ipelech tik itajku
muchi ne majmalintuk wan kwejkwelnaj, ma shikawanikan intzalan ken tajtawil tik
ne taltikpak, 16 wan ma shitajpiakan ne palabraj yultuk pal
nikpia taika nimuweymatiskia tik ne tunal ipal ne Mawaltijtuk, ika kipishtuk
ipatiw tay ne nitekitki wan nikujkutiak. 17 Melka uni, su mushinia nuesyu ken se
tetakulis wan se tekitilis ipanpa ne anmutayulmatilis, nipaki, wan niyulpaki
anmuwan, 18 wan anmejemet kenha anpakit wan anyulpakit
nuwan.
19 Nitejchia ma nechajkawa ne tajtzin Yeshu
niktuktia Timoteo anmutech talul, pal naja nusan nishpajpaki kwak nikmati ken
ijtuk anmuwan, 20 ika te nikpia aka ká kipia iyulu kenha ne
kimati ken annemit wan yulkakasiwi, 21 ika muchi kitemuat tay inpal, te tay ipal
Yeshu Mawaltijtuk. 22 Ankishmatit ne itaejekulis: yaja
nechpalewijtuk iwan ne yeknawatilis ken se kunet kipalewia iteku. 23 Yajini tel nikneki niktuktia anmutech
nemanhachin kwak nikita ken ijtuk nuwan. 24 Nikmati ka ne Tajtzin yawi kichiwa ma niajsi
naja nusan talul.
25 Ninak ka muneki ma niktukti anmutech nuiknew
Epaproditos, ne nechpalewia wan tasuma nuwan, wan ká anmupal se titanijtuk ne
tekiti nupal wan kichiwa tay nimuneki, 26 ika yaja metzintsujta muchi wan tajselia ika
antakaktiwit ka yaja kukushki, 27 wan nusan ijkia, yaja kukushki hasta achka
yawi miki. Melka uni, kipalewij ne Teut, inte yaja isel, naja nusan ne Teut
nechpalewij, pal te nikpia tay nechkukuskia nuyulu chiupiuk. 28 Yajika niktuktia nejnejmach pal kiane ma
shikitakan wan ma shipakikan senpa, wan ma intea nechkuku nuyulu. 29 Shikwikan tel anmutzalan tik itukay ne
Tajtzin iwan muchi ne pakilis, wan shiktasujtakan sejse ijkiuni, 30 ika ipanpa ne itekitilis ne Mawaltijtuk yaja
muajshitij itech mikilis, wan te mutajpishki pal weli kichiwa tay ne kinekiuk
ipal anmutekitilis nupal.
|
Ne
Bibliaj TIK NAWAT |
· Pilipoy |
Ini ijiswat muitat mas yek
iwan Windows 7 |
© 2012, Ne Bibliaj Tik Nawat © Jan Morrow |