Ne Bibliaj TIK NAWAT

Taneshtilis

Tay tajkwiluj ipal ne chikume sennemit

2

1 Shitajkwilu ipal ne tanawatiani ipal ne sennemit tik Epesos:

“Ini tay ina ne kipia ne chikume sital tik imayekkan, ne nejnemi tatajku ne chikume tawilkal ipal teukwit: 2 Nikmati ka titekiti wan tikujkutia wan titejchia nejnejmach, wan ka inte tiweli tikselia ne inte yejyek wan tikejekuj ne ká inat ka yejemetsan tijtitanijtuk wan te ijkia, wan tikajsit ka taketzat sanka; 3 wan tikpia tanejmachselilis wan tikselij ka numaku wan te tikujkutiak. 4 Melka uni, nikpia se ipanpa nimetzajwaskia: tay ne achtu tiktasujtak, intea tiktasujta kenha. 5 Shikelnamiki tel ken tinentuk achtu wan ashan tiwetztuk, wan shimuyulpata, wan shikchiwa ne mutekiw ken achtu. Asu inte, niaw niajsi mutech nikijkwani ne mutawilkal asu inte timuyulpata. 6 Melka ini, tikpia se tay yek, ka tikishijia ne itekiw ne itepewa Nikolaos; naja nusan nikishijia. 7 Ká ne kipia takakilis, ma takaki tay ne Ijiutzin kinhilwia ne sejsennemit. Niktakwaltis ne welituk tay ipal ne kwawit yultuk ne nemi tik ne iyekmil ne Teut.”

8 Shitajkwilu ipal ne tanawatiani ipal ne sennemit tik Smurna:

“Ini tay ina ne achtu wan ne tipan ne mikik wan muyulkwepki: 9 Nikmati ka tikpia uij wan timuneki, melka tikpia wey, wan ka kukujtaketzat yejemet ká inat ka Yudayujmet wan te ijkiuni, yejemet se sennemit ipal ne Tenewani. 10 Maka shimajmawi ika weli titaekua. Ashan ne Tamintuk yawi kintzakwa sejse anmejemet pal anmuejekuat wan anyawit kipiat uij ijtik majtakti tunal. Shimuchiwa yek hasta mikilis wan niaw nimetzmaka ne yawal yultuk. 11 Ká ne kipia takakilis, ma takaki tay ne Ijiutzin kinhilwia ne sejsennemit. Iwan ne welituk inte yawi muchiwa tatka tik ne ukse mikilis.”

12 Shitajkwilu ipal ne tanawatiani ipal ne sennemit tik Pergamos:

“Ini tay ina ne kipia ne espadaj kipia ume itan tik ne iten: 13 Nikmati kan timuchantia, kan nemi ne ikuijpal ne Tenewani, wan tinechpalewia, wan titayulmatki ka numaku nusan tik ne tujtunal ipal Antipas, ne tanutzki yek nupanpa, wan kimiktijket tik anmutechan kan ne Tenewani muchantia. 14 Melka uni, nikpia sejse ipanpa nimetzajwaskia: tikpia ikuni ankakeski ne yawit iwan ne itamachtilis Balaam, ne kimachtij Balak ma kitali se tatzunchaluas tik itachialis ne ipilawan Israel, ma kikwa ne tay mutakulijtuk ne teujteutzitzin wan ma tatzinhejenchiwa. 15 Ijkiasan tikpia taja nusan sejse yawit iwan ne intamachtilis ne itepewa Nikolaos. 16 Shimuyulpata tel, asu inte niaw nimunelwia niajsi mutech nimusuma inwan iwan ne espadaj ipal ne nuten. 17 Ká ne kipia takakilis, ma takaki tay ne Ijiutzin kinhilwia ne sejsennemit. Nikmakas ne welituk chiupi manaj inashtuk wan nikmakas se kusti istak, wan ijpak ne kusti ijkwilujtuk se itukay ne inte weli aka, sema ne kikwijtuk.”

18 Shitajkwilu ipal ne tanawatiani ipal ne sennemit tik Tuateyra:

“Ini tay ina ne Itelpuch ne Teut ne kipia ne iijish ken tit wan ne ijikshi kenha ken tumin wey ipatiw: 19 Nikishmati mutekiw wan mutetasujtalis wan mutayulmatilis wan mutekitilis wan mutanejmachselilis, wan nikmati ka ne tipan mas wey que ne achtu. 20 Melka uni, nikpia se ipanpa nimetzajwaskia: tikajkawa ne siwat itukay Izebel, ne ina ka yaja taketzani, kinmachtia wan kinshijshikua ne nutejtekitini, tatzinhejenchiwa wan kikwa tay mutakulijtuk ne teujteutzitzin, 21 wan nikmakak tiempoj pal muyulpata wan te kinekik kiajkawa itatzinhejenchiwalis. 22 Ashan niktamuta pak se petat wan muchi ká mawiltiat iwan yawit kipiat miak penaj asu inte muyulpatat ipanpa tay kichijtiwit, 23 wan niaw nikmiktia ne ipilawan, wan muchi ne sejsennemit yawit kimatit ka naja ne ká niktejtemua tik ne inyujyulu ne takamet, wan niaw nimetzinmaka muchi sejse ken itekiw. 24 Anmejemet ne sekit tik Tuateyra ne inte yawit iwan uni tamachtilis wan te kishmattiwit miktan ipal ne Tenewani, ken inat, naja nimetzinhilwia ka inte nimetzintamutilia ukse kimil; 25 sema shikitzkikan tay ankipiat hasta ma niwiki. 26 Wan ne welituk wan ne tajpia itekiw hasta ma tami, nikmaka tatuktilis ijpak ne tejtechan, 27 wan yawi kintekimaka iwan itupil ipal tepusti; ken kujkumit ipal sukit yawit kelunit, 28 ken naja nusan nikwij itech ne nuteku, wan nikmakas ne sital ipal tapuyawa. 29 Ká ne kipia takakilis, ma takaki tay ne Ijiutzin kinhilwia ne sejsennemit.”

Ne Bibliaj TIK NAWAT

· NE BIBLIAJ TIK NAWAT · Taneshtilis · Taneshtilis tik ukse taketzalis

Ini ijiswat muitat mas yek iwan Windows 7

© 2012, Ne Bibliaj Tik Nawat © Jan Morrow