Ne Bibliaj Tik Nawat

Ne Bibliaj

TIK NAWAT

Taneshtilis

Ne ikuijpal ne Teut

1 Tipan nitachishki wan nikitak ka tapuik tik ne ilwikak wan ne kupak ne nikakik achtu ken se trompetaj nechnutza wan ina: “Shaltejku ka nikan wan niaw nimetzilwitia tay ne yawi muchiwa tipan.”

2 Nemanha nimuchijki iwan iijiu, wan né nemituya se kuijpal tik ne ilwikak, wan se muetztuk ijpak ne kuijpal, 3 wan ne itachialis ne muetztuk ken kujkusti wejwey ipatiw, wan se kusamalut kiyawalua ne kuijpal, ne muita ken se esmeraldaj.

4 Wan ne kuijpal nemituya yawalujtuk iwan senpual-nawi kuijpal, wan ijpak ne kujkuijpal senpual-nawi noymet muejmuetztuk, tzajtzaktuk iwan inkwajkwach istak, wan ijpak intzujtzuntekun nemituyat yajyawal ipal teukwit.

5 Wan tik ne kuijpal kisat sejse ken takipini, wan mukakit sejse ken tzalani wan tikwini, wan chikume tawil tatat iishpan ne kuijpal, yejemet ne chikume nawal ipal ne Teut, 6 wan iishpan ne kuijpal ken se at chipawak ipal vidrioj, wan nemit tik itajku ne kuijpal wan kiyawaluat ne kuijpal nawi tay yujyultuk, tejtentuk iwan inhijish ka ishpan wan ka ipan.

7 Wan ne achtu tay yultuk ken se leon, wan ne ukse tay yultuk ken se turuj, wan ne yey kipiatuya ne iishkalyu ken se takat, wan ne nawi ken se kwawti patani. 8 Wan ne nawi tay yultuk kipiatuyat sejse chikwasen iejtapal. Tatenpan wan taijtik tejtentuk iwan inhijish, wan te muketzat inat ka tunal wan ka tayua:

“Wey, wey, wey

ne tajtzin Teut weli muchi,

ne nemik, ne nemi wan ne witz.”

9 Wan kwak ne tay yujyultuk yawit inat ka wey wan yawit kimakat respetoj wan panpadiush ne muetztuk ijpak ne kuijpal ne yultuk senpa wan senpa, 10 yawit wetzit talchi ne senpual-nawi noymet iishpan ne muetztuk ijpak ne kuijpal, wan yawit mutankwaketzat tik itachialis ne senpa wan senpa yultuk, wan yawit kitamutat ne inyajyawal iishpan ne kuijpal inat:

11 ”Yek ma shikwi, tutajtzin Teut,

weytzitzinakalis, respetoj wan mutajpal,

ika taja tiketzki muchi,

ipanpa mutaelewilis nemi wan muchijtuk.”

Ne Bibliaj

TIK NAWAT

· NE BIBLIAJ TIK NAWAT

· Taneshtilis

· Taneshtilis tik ukse taketzalis

Ini ijiswat muitat mas yek iwan Windows 7