Ne Bibliaj Tik Nawat

Ne Bibliaj

TIK NAWAT

Taneshtilis

1 Wan nechmakaket se uat ne muita ken se kwawit, wan ina: “Shu shiktamachiwa ne iteupantzin ne Teut wan ne tikashit wan ne mutankwaketzat kalijtik, 2 wan shikajkawa ne tenkal tatenpan ne teupantzin, maka shiktamachiwa uni, ika yaja ipal ne tejtechan, wan yawit taksat ijpak ne itechan Teut ijtik unpual-ume metzti. 3 Wan nikinhajkawas ne ume ne taneshtiat ne tejkia nupanpa ma taketzakan ipal Teut mil-ume-tzunti-yeshpual tunal tajtakentijtuk tik kustalkwachti.”

4 Ini ne ume kuyuolivaj wan ne ume tawilkal ejejkatuk iishpan ne tajtzin ipal ne taltikpak. 5 Wan su aka kineki kinchiwilia tatka, yawi kisa tit tik intejten wan yawi kintulua ne kinekit kijtakuat. Wan su aka yawi kineki kinchiwilia tatka, ijkiuni yawit mikit. 6 Yejemet kipiat ne tatuktilis pal kitzakwat ne ilwikak pal kiane inte yawi wetzi at tik ne tujtunal ipal ne inteutaketzalis, wan kipiat tatuktilis ijpak ne at pal kikwepat esti wan pal kitasat ne tal iwan muchi ne kujkukulis keman kinekit.

7 Wan kwak yawit tamit taneshtiat ne tejkia, ne tekwani ne kisa ne miktan wan tejku witz, yaja yawi kinsuma wan yaja weli mas wan yawi kinmiktia; 8 wan ne inmijmikini muajsisket tik itajku ne weytechan ne munutza ma tinakan Sodom wan Egipto, kan ne nusan mucruzpiluj ne intajtzin; 9 wan sejse ipal ne tejtechan wan trijtribuj wan tajtaketzalis kinhitasket ne inmijmikini ijtik yey tunal wan tajku, wan ne mijmikini inte kinhajkawasket kintaliat ijtik se shaput, 10 wan pajpakisket ne chanejket pak ne tal inpanpa wan muyulkwesusket wan mutakulisket sejse wan sejse, ika uni ume taketzani kichiwijket ka kinkukua ne chanejket pak ne tal.

11 Wan kwak panutiwit ne yey tunal wan tajku, se iijiu yultuk ne kiski itech ne Teut kalakik ijtik yejemet wan muketzket ikshipan wan mumutijket ne tachiat nemit, 12 wan kikakket se tik ne ilwikak taketza wan ina: “Shitejkukan nikan!” Wan tejkuket ka ikajku ijtik ne mishti, wan tachishket ne kinekit kinhijtakuat. 13 Wan tik uni horaj ulinik sujsul, wan wetzki se majtaktakutun ipal ne techan, wan tik ne talulin mikiket chikume mil takat, wan ne sejseuk nakaket iwan mawi wan inaket ka wey ne Teut ipal ne ilwikak.

14 Yajki ne ukse Ay. Né witz ne yey talul.

15 Wan tatzutzun ne tipan tanawatiani, ne chikume, wan tzajtziket wey tik ne ilwikak inat:

Ne tatekimakalis ipal ne taltikpak muchijtuk ipal ne tutajtzin, wan ipal ne imawaltijtuk, wan yaja tatekimakas pal senpa wan senpa.”

16 Wan ne senpual-nawi noymet iishpan ne Teut, muejmuetztuk ijpak ne inkujkuijpal, mutamutaket talchi wan mutankwaketzket ishpan ne Teut, 17 wan inat:

Timetzilwiat panpadiush,

ne Tajtzin ne Teut weli muchi,

ne nemi wan ne nentuk,

ika tikwij ne mutajpal wey wan titatekimakatuk,

18 wan kwalantiwit ne tejtechan,

wan walajtuk ne mukwalan,

wan ne tunal pal ne miktiwit

muchiwat juzgar,

wan pal tiktashtawia ne inpatiw

ne mutejtekitini ne taketzanimet

wan ne tayulmatit

wan ne metztakamatit

chijchikitik wan wejwey,

wan pal tikinpulua ne kipuluat ne taltikpak.

19 Wan tapuik ne iteupantzin ne Teut ne nemi tik ne ilwikak, wan muitak ne takukal ipal ne isentaketzat tik ne iteupantzin. Wan takipinik wan tzalanik wan tikwinik wan ulinik wan tepewket wey tejtesijkwil.

Ne Bibliaj

TIK NAWAT

· NE BIBLIAJ TIK NAWAT

· Taneshtilis

· Taneshtilis tik ukse taketzalis

Ini ijiswat muitat mas yek iwan Windows 7