Ne Bibliaj Tik Nawat

Ne Bibliaj

TIK NAWAT

Roma

Sejseuk pal tami

1‑2 Ini ne tuiknew Poybe. Nimetzintajtani ma shikwikan yek anmutzalan, ken sejse tayulmatit. Ini siwat tekiti ipal ne sennemit ipal Kenkreay. Shikpalewikan iwan muchi tay yaja metzinhilwia ka muneki, ika yaja kipalewijtuk muchi tukniwan, wan naja nusan nechpalewij.

3 Shiktajpalukan Prisca wan Aquilla, nutepalewianimet tik tutekiw ipal ne Mawaltijtuk Yeshu; 4 yejemet mutemakaket pal nechishtiat melka welituskiat mikit yejemet nupanpa. Tesu naja nusel nikinhilwia panpadiush, nusan muchi ne sejsennemit ipal ne tejtechan. 5 Shiktajpalukan ne sennemit tik ne inkal nusan.

Shiktajpalukan nukunpa yektasujtatuk, Epaynetos, ká se pal ne ajachtu Cristianoj tik Asia.

6 Shiktajpalukan Maryam, ne ká sujsul kujkutiatuk anmupal.

7 Shiktajpalukan Andronikos wan Junia, nukniwan ká iwan ninentuk ilpituk; muchi kishmatit uni tijtitanijtuk, ká muchijket Cristianojmet hasta achtu ka naja.

8 Shiktajpalukan Ampliatus, nukunpalej yektasujtatuk tik ne Tajtzin.

9 Shiktajpaluken Urbanus, tutepalewiani tik ne Mawaltijtuk, wan nukunpalej yektasujtatuk Estakus.

10 Shiktajpalukan Apeles, ne iyekitztuk ne Mawaltijtuk.

Shiktajpalukan muchi ichan Aristobulos.

11 Shiktajpulukan nuiknew Heriodion.

Shiktajpalukan muchi ká ipal ne Tajtzin ichan ne Narciso.

12 Shiktajpalukan Tripayna wan Triposa ne kujkutiat tekitit ipal ne Tajtzin.

Shiktajpalukan Persis yektasujtatuk, ká kujkutia wey ipal ne Tajtzin.

13 Shiktajpalukan Rufus, ne ishpejpentuk ipal ne Tajtzin, wan ne inan, ká nusan nunan.

14 Shiktajpalukan Asunkritos, Plegon, Hermes, Patrobas, Hermas wan ne tekniwan ne iwan nemit.

15 Shiktajpalukan Pilologos wan Julia, Nereus wan ne ieltiw, wan Olunpas, wan muchi ne tayulmatit ne nemit inwan.

16 Shimutajpalukan wan shimutennamikikan ken tayulmatinimet. Muchi ne sejsennemit ipal ne Mawaltijtuk metzintajpaluat!

17 Nimutajtawelia anmuwan, nukniwan, ma shikpajpachiwikan, ika nemit sejse ká kichiwat tzajtzayanilis wan tajtatzunchaluas ipatka ne tamachtilis ne anmumachtijtiwit. Shikinwejkaajkawakan, 18 ika yejemet inte tekitit ipal ne tutajtzin ne Mawaltijtuk, semaya tekitit ipal ne iijti, wan inat tay yektzin pal kishijshikuat ne melemet. 19 Ika kishmatit ne anmutetakamatilis nujme, wan naja nipaki. Melka uni, niknekiskia ma shikmatikan wey kwak annemit iishpan ne yek, wan ma te shimukwelpachukan iishpan ne teyek. 20 Ne Teut ipal nejmachnemilis yawia kichiwa ka antaksat ijpak ne Tenewani hasta ankimumushuat. Ma nemi ne teutasujtalis ipal tutajtzin Yeshu anmuwan!

21 Metzintajpaluat Timoteo ne nutepalewiani, wan nukniwan Lucius wan Yason wan Sosipatros. 22 Nimetzintajpalua naja, Tertius ne kijkwiluj ini amat, tik itukay ne Tajtzin. 23 Metzintajpalua Gaius ne ichan ninemi naja wan muchi ne sennemit. Metzintajpaluat Erasto, ne tuminpiani ipal ne techan, wan Quartus ne iikaw. (24) .

[Se teutajtanilis

25 Ma inakan senpa ka wey Yaja ká weli metzinmaka fuerzaj iwan ne nuyeknawatilis wan ne tanajnawatilis ipal Yeshu Mawaltijtuk, iwan ne taneshtilis ipal se ichtaka ne ikman te aka kimati katka; 26 ne muneshtijtuka ashan iwan ne tay kijkwilujket ne taketzanimet ika ne Teut pal senpa tatuktijtuk, pal takakit wan kitakamatit wan tayulmatit muchi ne tejtechan: 27 ne Teut, ne isel kimati muchi, itech Yeshu Mawaltijtuk, amen.]

Ne Bibliaj

TIK NAWAT

· NE BIBLIAJ TIK NAWAT

· Roma

· Roma tik ukse taketzalis

Ini ijiswat muitat mas yek iwan Windows 7