|
| Yojan |
|
Ne Iyeknawatilis Yojan ne amat nawi ipal ne Yankwik Sentaketzat. Yaja ne tipan yeknawatilis. Ini amat techilwia ka Yeshu Mawaltijtuk Teut, ka yaja ne ipalabraj ne Teut mukweptuk takat wan walajtuk ne taltikpak. Tik ini amat, Yeshu kinhilwia ne mumachtianimet ka yaja ken ne Teut; ne ajachtu yey yeknawatilis te. Nusan, tik ini amat Yeshu kichiwa sujsul miak pal muishmati, pal titayulmatit ka yaja Teut. Ne Iyeknawatilis Yojan te kenha ken ne uksejse yeknawatilis: sejse inat ka te muchiwki muchi ken yaja ina, wan sejseuk inat ka yajni ne yeknawatilis sea tejkia.
Ne Iyeknawatilis Yojan pewa ina ka "Achtu nemik ne palabraj", ne ipalabraj Teut, wan "Teut ne palabraj"; ne palabraj "nemik ijtik ne taltikpak wan yajasan kichijki ne taltikpak, wan ne taltikpak inte kishmatki". Kwakuni ne palabraj mukwepki takat wan yaja Yeshu, ne Mawaltijtuk: "Wan ne palabraj weykakiski wan tutzalan muchantij wan tikitaket tzitzinaka."
Kwak tami ini achtu takutun, ne amat techilwia sujsul miak tay Yeshu kichiwki wan inak. Kinnutza mumachtianimet, wan yawit Yerushalem. Ne palejmet kitzkiat, kichiwat juzgar wan kicruzpiluat. Muketza wan ne imikini te kanaj tik ne shaput wan yawit kitemuat. Kinnutza ne mumachtianimet wan kintuktia tamachtiat ne ipalabraj nujme.
Ini tay inak Yeshu tik ini amat: ka yaja te kiski ne taltikpak, yaja kiski itech Teut ka ikajku, ajsik ini taltikpak melka yaja te ipal ne taltikpak; wan ina ka ne kiyulmatit wan yawit iipan nusan te ipal ini taltikpak. Yaja inak ka yawi walmukwepa pal kinwikat ne yejyek iwan tik ne ilwikak.
|
|
