|
| Taneshtilis |
|
Ne Itaneshtilis Yojan ne tipan amat ipal ne Yankwik Sentaketzat. Yaja chiupi weyak, wan te kenha ken muchi ne sejseuk; yaja munutza se amat "apocalipticoj". Uni kineki ina ka yaja taketza ipanpa tay yawi muchiwa, ken yawi tami muchi, wan sejse tay ne tajkwiluani kitak (ika muneshtij ishpan ne ijish) kwak kitemikik o tik se tachialis. Ikman nemituyat miak amat ijkiuni ne kipiatuyat ne Yudayujmet wan nusan ne Cristianojmet; se yejemet ne amat ipal Daniel tik ne Achtu Sentaketzat. Melka nemit uksejse takutun tik ne Yankwik Sentaketzalis kan ina tay yawi muchiwa, sema kipia se amat ne muchi ijkiuni, yajini ne muilwia Taneshtilis.
Melka tik ini amat ne tajkwiluani ina ka yaja Yojan, te tikmatit su yajaya ne Yojan ne kitajkwiluj ne Ne Iyeknawatilis Yojan wan ne tajtajkwilul ipal Yojan o te: ikman inat katka ka ijkia, ashan techilwiat ka muita ka ne yey te kenhat. Ne tajtaika: ken tajkwiluat ne yejyey, tay tamachtiat wan keski welit ne Greciajtaketzalis, muchi tekenhat.
Taneshtilis se amat uij pal tikmatit tay kineki ina. Yojan techilwia ka kitak miak pal tishpuyawit tik nawi tachialis. Kisat tanawatianimet, wan muitat sejse tetekiat; taketza ipanpa itatekimakalis ne Teut wan ne tipan juicioj. Ina ka yawit witzet se yankwik ilwikak wan se yankwik taltikpak. Ne amat uij ika muchi nemi tentuk iwan sijsimboloj; yaja kwak tinat se wan sejse kimatit ka uni kineki ina seuk. Tikitakan se machiut (ejemploj).
Miak tay muneshtiat tik ini amat panut chikume-chikume. Pal pewa, kintajpalua sejse ika ne "chikume sennemit ne nemit tik Asia" (1:4, 1:11) wan kinmaka sejse itaneshtilis. Kwakuni (5:1) tikpiat se kukulamat piktuk iwan chikume sajti (selloj), wan chikume trompetaj (8:2), wan tami iwan ne "chikume wajkal ipal ne ikwalan ne Teut" (16:1). Nusan nemit "chikume nawal tik itachialis ne kuijpal", "chikume tawilkal ipal teukwit", "chikume sital", ne ichkakunetzin kipia "chikume cachoj wan chikume ijish", mukakit "chikume tikwinit", nemi se kuat majwey "kipia chikume itzuntekun... wan ijpak itzuntekun chikume yawlilpika" wan se tekwani iwan chikume itzuntekun, wan nusan walmuneshtiat "chikume tanawatiani, ne kipiatuyat chikume kukulis", wan "chikume tepet kan ne ijpak mutalia ne siwat", chikume tatuktiani, chikume kusti ipal teukwit...
Taika chikume? Tay kineki ina? Uij ma tikmatikan. Tejkia ka tik miak amat tikajsit sejse simboloj ijkiuni. Ini amat tekenha ika tinaskiat ka tik muchi tay ina anka tepewi iwan wey simbolismoj; timunekit tikmatit ken nemi pal titakakit. Sejse simboloj welit tikmatit. Ipal se machiut: su tikitat tay techilwia ne takutun 5 ipal ini amat, te uij ma tikmatikan ka "ne muetztuk ijpak ne kuijpal" kineki ina ne Teut wan ne "ichkakunetzin (cordero) ejkatuk ken miktijtuk" kineki ina ne Mawaltijtuk. Melka uni, nemit uk miak simboloj sujsul ujuij pal tikmatit.
Ne tay tikmatit: ini amat techneshtia se wey guerraj ijtik ne yek wan ne inteyek. Ne itekuyu ne yek ne Yeshu; ne itekuyu ne inteyek, ne Tamintuk. Sejse inat ka ini amat kineki ina ma tikmatikan tik tuyulu ka ne Teut yawi tami kitajkali ne inteyek; sejseuk, ka techilwia tay yawi panu tik ne tijtipan tunal; wan sejseuk ka anka yaja ken se takwikalis, ne mukaki yektzin melka te tikmatit tay kineki ina.
|
|
