ESPAÑOL | ENGLISH

Tiweli tikwi ne tzawalamat ipal Ne Bibliaj Tik Nawat wan ne tay kipia kalijtik mupal pero inte pal munamaka. Te weli tikpata, tikmajmaka, tikchiwa miak copiaj, tikishtia ken amat, tikinmaka sejseuk, tikwepa ukse ajamat, tikpanultia ken tepal nian tiknamaka tamatilis o pajpalabraj ne muishtilijket tik nebibliaj.org o salujtuk iwan su te tajkwiluat ne tajkwiluani wan ne itekuyu pal inat ka metzajkawat. Melka uni, weli titamaka kujkutu takutuntzitzin (ma te ajsikan hasta muchi se takutun) su naka kenha wan su te tikpatatuk tatka, su tina, ken muneki, ka witz tik Ne Bibliaj Tik Nawat.

Shikalaki tik Ne Bibliaj Tik Nawat!

Ne tzawalamat (página web) ipal Ne Bibliaj Tik Nawat, nebibliaj.org, muchijki ipanpa ume tay tiknekiskiat tikchiwat. Ne achtu, pal tiwelit timetzilwiat ken ijtuk iwan ini tutekiw pal tikpatat ne Bibliaj tik Nawat. Ne seuk, ma muchi kipiakan ne Bibliaj tik Nawat pal kishmatit wan pal amaitat kwak kinekit tik ne matapan (internet).

Ashan welit tinat ka tamik mupata ne Yankwik Sentaketzat (Nuevo Testamento) tik Nawat, wan pejki mupata ne Achtu Sentaketzat (Antiguo Testamento). Tik ini tunal muajsi tik ini tzawalamat se tajku ipal ne Yankwik Sentaketzat wan ne ukse tajku yawi mutalilia tik ne ajachtu tunal ipal 2012.

Pal tikita se takutun ipal ne Bibliaj: Achtu shikchiwa klik tik ne ilpika (vínculo) ipal ne amat (ipal se machiut [ejemploj], Matay, kineki ina ne amat munutza Mateo tik Castillaj). Uni muajsi tik ne izquierdaj ipal ini ijiswat, wan nusan nemi tik ne Achtu Iswat. Neman shikchiwa klik tik ne tapual (número) wan weli titachia. (Su ne amat semaya kipia se takutun, shikchiwa klik kan ina "Shikita ini amat".)

Pal tiktemua pajpalabraj tik ne Bibliaj: Weli tikwi se "tatemuani" (buscador - ken Google) pal tiktemua pajpalabraj: shiktali "NEBLIAJ" wan ne tay tiktemua.

Sejse tay timetznawatiat: Kwak tiaw tikita se takutun, yek ma shikwi ne ukse boton ipal ne kimichin wan ma shiktapu ne iswat tik ukse tentzin (ventana). Su te, nusan weli tikwi ne boton "ka teputz" (retroceso) o ne ilpika kan tami ne iswat pal timukwepa tik ne iswat ipal ne amat. Su tikneki tikita ne Bibliaj tik ukse taketzalis, nusan nemi kan tami ne iswat ukse ilpika ina "... tik ukse taketzalis" ne yawi metzwika tik ne tzawalamat itukay Bible Gateway kan nemit Bijbibliaj tik miak taketzalis - ken ne Ingles, ne Castillaj, nusan ne Meshijkataketzalis.

Pal titechishmati: Tik ini tzawalamat nusan tiweli tikita sejse tay titajkwilujtiwit pal timetzilwiat ká tejemet wan ken ijtuk iwan ini tutekiw (nikan). Nusan kipia ijilpika pal timetzpalewiat tikajsi sejse tamatilis tik ne matapan (nikan).