|
| Matay |
|
Ne Iyeknawatilis Matay ne itukay ne achtu amat ipal ne Yankwik Sentaketzat. Yaja se pal ne nawi yeknawatilis. Ina tay kichiwki, ken tekitki, ken mikik wan muketzki senpa ne Yeshu.
Inat ka pejki ini amat ijtik ne Yudayujmet Cristianojmet nemituyat tik Siria tik ne tijtipan shiwit ipal ne achtu sigloj. Te tikmatit ká ne tajkwiluani. Muita ka yaja kikwij ankakeski amat; se yejemet ne Iyeknawatilis Marcus.
Ini amat ina ka Yeshu ne Mawaltijtuk ipal Israel; melka uni, ne techan te kinekituya. Yaja nakak ijtik ne imujmumachtiani wan kintuktij sejse yejemet, ne "tijtitanijtuk", pashaluat ijtik ne tejtechan tamachtiat ipanpa ne Teut.
Pal pewa, ina ká ne inoywan Yeshu; ina ka ne Tatuktiani David se itatanoy pal ikman. Ne amat techilwia ken nesik, chuluj ka Egiptoj wan mukwepki ka Nazaret.
Kwak yaja takat, yajki mumaka ulyuj itech Yojan. Tipan nakak unpual tunal tik ne kojtan; ne Tamintuk kinekituya kishijshikua wan te welik. Yajki Galilaya tamachtia. Ne amat techilwia tay tamachtij tik ne tepet. Inak ken nemi pal tiktajtanit ne Teut ("Tuteku ka ikajku, ma inakan ka wey mutukay..."). Kinpajtia miak ká kukuyat. Kinnutza majtakti-ume mumachtiani wan kintitania tamachtiat wan tapajtiat tik miak techan.
Ina ne amat ka sejse Yudayuj intukay ne Parishayujmet kishijiat Yeshu ika inat ka yaja kukujtaketza wan tekiti ipal ne Tamintuk. Yeshu tamachtia ka yawi witz ne itatekimakalis ne Teut; ina cajcasoj pal muchi kimatit ka nemi pal timuekchiwat pal kwak yawi witz.
Yeshu yawi hasta Yerushalem tik ilwit pal ne Paskwaj, wan ne imujmumachtiani yawit iwan. Yaja kinhilwia ka yawit kimiktiat wan kwak mikik yawit panut yey tunal wan yawi muketza senpa. Kwak nemit tik Olivajtepet, inawak Yerushalem, ajsit ne tasumanimet, kitzkiat wan kiwikat itech ne tatuktianimet. Kichiwat juzgar wan inat ma mucruzpilu (kineki ina, ma kisalukan pak se cruz pal kimiktiat).
Miki Yeshu wan kitekat ijtik se shaput. Kwak tatwi, yawit ne siwatket kan nemituya wan ne mikini te kanaj. Kiajsit se tanawatiani wan kinhilwia ka Yeshu muketztuk ken kinhilwijtuya wan yawi nemi tik Galilaya. Ne mumachtianimet mukwepat Galilaya wan kinamikit ka né.
|
|
