|
| 1 Yojan |
|
Ikman panutuk inat katka ka sanse takat — ne muilwia "Yojan ne Tayeknawatiani" — kitajkwiluj Yojan (ne yeknawatilis nawi), Ne Achtu Tajkwilul Ipal Yojan wan uk ume itajtajkwilul ipan witzet, wan anka ne Taneshtilis nusan. Ne tamatinimet pal ashan inat ka te ijkiuni. Melka uni, tiwelit tinat ka su te kipiat ne se tajkwiluani, ne tajtajtanilis ne tikasjsit ijtik yejemet kenhat. Anka kineki ina ka ini tajkwiluanimet muchi ipal ne se "tamachtiluyan" (ne itamachtiluyan Yojan).
Ini amat te muita ken se amat ipal aka, te ina ká ipal nian ká tajkwiluj. Mumati ka kwak mutajkwiluj nemituyat achka te wejka ne shiwit 100, tik Epesos. Tik uni tujtunal sejse pejket inat ka Yeshu te walaj ken se iweyka, semaya tik ne iijiu. Tik 1 Yojan ina ka te ijkiuni. Nusan taketza ipanpa ken welit tikishmatit se tamachtiani su yek o sankatamachtiani. Ina ka nemi pal tikitat yey tajtanilis: ken muwika, tay ina ipanpa ken Yeshu walaj, wan ne itetasujtalis.
Ijtik ini amat nemi se kan te muchi inat kenha, tik ne vejversiculoj 5:7-8. Tik ini Yankwik Sentaketzat tiawit tikitat ka ina kiene: "Ika nemit yey ká inat tejkia: ne Iijiu wan ne at wan ne esti, wan ne yey nemit ijtik ne sechin". Yaja ne tapatalis ipal ne tay tikitat tik ne ajamat pal sea ikman, tik ne Greciajtaketzalis: "οτι τρεις εισιν οι μαρτυρουντες το πνευμα και το υδωρ και το αιμα και οι τρεις εις το εν εισιν". Ne tamatinimet inat ka kwak pejki, yaja ijkiuni.
Melka uni, kwak panuket miak shiwit wan muchiwki ne Bibliaj tik Latintaketzalis ne muilwia Vulgata, né tikitat se mas weyak wan ina: "Quoniam tres sunt, qui testimonium dant in caelo: Pater, Verbum, et Spiritus sanctus: et hi tres unum sunt. Et tres sunt, qui testimonium dant in terra: Spiritus, et aqua, et sanguis: et hi tres unum sunt." Ini kineki ina: "Ika nemit yey ká inat tejkia tik ne ilwikak: ne Teteku, ne Palabraj wan ne Ijiutzin, wan ne yey nemit ijtik ne sechin; wan nemit yey ká inat tejkia tik ne tal: ne Iijiu wan ne at wan ne esti, wan ne yey nemit ijtik ne sechin". Wan inat ka ini pajpalabraj ne mutalilijket, nemit pal tailwitiat ka tejkia ne tamachtilis ipal ne Yeykayu (trinidad). Nikan te tiwelit titamakat uni pajpalabraj tajtalilijtuk ika te nemituyat ijtik ne ajachtu amat kwak mutajkwilujket.
|
|
